މާލޭގެ ހެންވޭރު ސަރަހައްދުގެ ގެޔަކުން ވައްކަންކުރި މައްސަލައެއްގައި ދެ މީހަކު ހައްޔަރުކޮށްފައިވާ ކަމަށް ދިވެހި ފުލުހުންގެ ޚިދުމަތުން މިއަދު ހާމަކޮށްފި އެވެ.
ފުލުހުންގެ މަޢުލޫމާތު ދޭގޮތުގައި، މި މައްސަލަ ފުލުހުންނަށް ރިޕޯޓުކޮށްފައިވަނީ މިދިޔަ ނޮވެންބަރު މަހުގެ 14 ވަނަ ދުވަހު އެވެ. މި މައްސަލައިގެ ތުހުމަތުގައި ހައްޔަރުކޮށްފައިވަނީ ހ. ސަމާ ގްރީން، އިބްރާހީމް ޒަކަރިއްޔާ (33 އަހަރު) އާއި ސ. ހިތަދޫ، ކުރިބޯށިގެ، މުޙައްމަދު ޒަރީރު (36 އަހަރު) އެވެ.
ފުލުހުން ބުނާ ގޮތުގައި، މި ދެ މީހުން ވަގަށް ނެގިކަމަށް ތުހުމަތުކުރެވޭ އިލެކްޓްރޯނިކް ތަކެތި ގެއެއްގެ ތެރޭގައި ފޮރުވާފައި ހުއްޓާ ފުލުހުން ހޯދާފައިވެއެވެ. މި ތަކެތީގެ ތެރޭގައި ލެޕްޓޮޕްތަކަކާއި، މޯބައިލް ފޯނުތަކެއްގެ އިތުރުން އެހެނިހެން ތަކެތި ހިމެނެ އެވެ.
ހައްޔަރުކުރެވުނު ދެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، 15 ދުވަހަށް ބަންދުކުރުމަށް ކޯޓުން ނިންމާފައިވާ ކަމަށް ފުލުހުން ހާމަކޮށްފައިވެ އެވެ.
ފުލުހުން އިތުރަށް ބުނާ ގޮތުގައި، މި މައްސަލައިގެ ތަޙުޤީޤު މިހާރުވެސް ކުރިއަށްދާ ކަމަށާއި، އިތުރު މަޢުލޫމާތު ލިބުމުން އާންމުކުރާނެ ކަމަށެވެ.
