ކުރީގެ ރައީސް އިބްރާހިމް މުހައްމަދު ސޯލިހު އަންނަ ރިޔާސީ އިންތިހާބުގައި ވާދަނުކުރައްވާނެ ކަމުގެ އިޝާރާތެއް ކުރައްވައިފި އެވެ.
މިފަދަ މޭރުމަކުން އެމަނިކުފާނު ވާހަކަދެއްކެވީ ރާއްޖެ ޓީވީގެ ޕްރޮގްރާމަކަށް ދެއްވި އިންޓަވިއުއެއްގަ އެވެ.
އިންޓަވިއުގައި ރައީސް ސޯލިހު ވިދާޅުވީ އެމަނިކުފާނުގެ ސިޔާސީ މުސްތަގުބަލާ ގުޅޭގޮތުން އެމްޑީޕީގެ އިސްވެރިންނާ މަޝްވަރާކުރައްވާފައިވާ ކަމަށެވެ. އަދި އެމަނިކުފާނުގެ ނިންމެވުން ޕާޓީގެ އިސްވެރިންނަށާއި އާއިލާގެ ބައެއް ބޭފުޅުންނަށް އެނގިވަޑައިގަންނަވާނެ ކަމަށްވެސް ވިދާޅުވި އެވެ.
ރައީސް ސޯލިހު އިތުރަށް ހާމަކުރެއްވި ގޮތުގައި، އެމްޑީޕީ އިން އަންނަ ރިޔާސީ އިންތިހާބަށް ކުރިމަތިލައްވަން ބޭނުންފުޅުވާ 4 ނުވަތަ 5 ބޭފުޅަކު އެބަ ތިއްބެވި އެވެ. ގިނަ ބޭފުޅުން ބައިވެރިވެވަޑައިގެން ވާދަވެރި ޕްރައިމަރީއެއް ބޭއްވުމަކީ އެމަނިކުފާނު އެދިވަޑައިގަންނަވާ ގޮތްކަމަށް ރައީސް ސޯލިހު ވިދާޅުވި އެވެ. އަދި މި ހުރިހާ ބޭފުޅުންނަށްވެސް ޕާޓީ ހިންގުމުގައި ޝާމިލުވުމަށް އެދިވަޑައިގެންފައިވާ ކަމަށް އެމަނިކުފާނު ވިދާޅުވި އެވެ.
ރައީސް ސޯލިހު ވިދާޅުވީ އަންނަ ރިޔާސީ އިންތިހާބުގައި ކުރިމަތިލައްވަން ބޭނުންފުޅުވާ ހުރިހާ ބޭފުޅުންނަށްވެސް ކުރިއަށް ވަޑައިގަތުމަށް އެދިވަޑައިގެންފައިވާ ކަމަށެވެ. ނަމަވެސް އެމަނިކުފާނުގެ އަމިއްލަ ނިންމެވުން މިވަގުތު އާންމުކޮށް ހާމަކުރެއްވުމަކީ ޕާޓީއަށް ލިބޭނެ ފައިދާއަށްވުރެ ގެއްލުން ބޮޑުވެދާނެ ކަމެއް ކަމަށް ދެކެވަޑައިގަންނަވާ ކަމަށް ވިދާޅުވި އެވެ.
އެމަނިކުފާނު ވިދާޅުވި ގޮތުގައި އެމަނިކުފާނަކީ ޕާޓީގެ ކުރިމަގަށް އޮތް ހުރަހަކަށްވެވަޑައިނުގަންނަވާނެ ކަމަށެވެ،
މި ވާހަކަފުޅުތަކުން ރައީސް ސޯލިހު އަންނަ ރިޔާސީ އިންތިހާބުގައި ވާދަ ނުކުރައްވާނެ ކަމަށް ބެލެވެ އެވެ. ނަމަވެސް، އެމަނިކުފާނުގެ ނިންމެވުން ރަސްމީކޮށް އިއުލާނު ކުރައްވާފައެއް ނުވެ އެވެ.
