ގެޔަކަށް ވަގަށްވަދެ އަގުބޮޑެތި މުދާތަކެއް ވަގަށް ނެގި މައްސަލައިގައި ހިމެނޭ މީހަކަށް ޖަލު ހުކުމެއް އިއްވައިފި އެވެ.
މި މައްސަލައިގައި ދައުވާ ކޮށްފައިވަނީ ގދ. ތިނަދޫ އިސްހާގު ހަސަންއަށެވެ. މީނާގެ މައްޗަށް އުފުލާފައިވަނީ، އެހެން މީހެއްގެ މުދަލަށް ހުއްދަނޫން ގޮތުގައި ބާރު ހިންގުމުގެ ކުށުގެ ދައުވާއާއި އެނގިހުރެ ހުއްދަނޫން ތަނަކަށް ވަނުމުގެ ކުށުގެ ދައުވާ އެވެ.
މި ދެ ދައުވާ މީނާގެ މައްޗަށް އުފުލާފައިވަނީ 21 ނޮވެންބަރު 2023 ވަނަ ދުވަހު ކ. މާލެ މ. ތްރީއޭވިލާގޭގެ 7 ވަނަ ފަންގިފިލާއަގައި ހުންނަ އެޕާޓްމަންޓަށް އެތަނުގެ ވެރިފަރާތުގެ ހުއްދަނެތި ވަދެފައިވާތީއާއި އެ އެޕާޓްމަންޓޫން އެޕަލް ބްރޭންޑްގެ އައިފޯން 13 ޕްރޯ މެކްސްގެ 2 ފޯނާއި އައިފޯން 8 ޕްލަސްގެ ފޯނަކާއި ރޮލެކްސް ބްރޭންޑްގެ ގަޑިއަކާއި އަނގޮޓިއެއް ވަގަށް ނަގާފައިވާތީ އެވެ.
ކްރިމިނަލް ކޯޓުގައި މީނާއަށް މި ދައުވާތައް އިއްވުމުން މީނާވަނީ ކުށަށް އިއުތިރާފުވެފަ އެވެ. ދައުވާތަކަށް މީނާ އިއުތިރާފުވުމުން މައްސަލަ އަވަސްނިޔާގެ އުސޫލުން ކުރިއަށް ގެންގޮސް، މީނާގެ މައްޗަށް ކުށް ސާބިތުވާ ކަމަށް ކަނޑައަޅާފައިވެ އެވެ.
މި މައްސަލައިގައި މިދިޔަ ބްރާސްފަތި ދުވަހު މީނާގެ އަށްވަނ،ީ އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރު ހިންގުމުގެ ކުށް ސާބިތުވުމުން 1 އަހަރާއި 7 މަހާއި 6 ދުވަހުގެ ޖަލު ހުކުމެއް އިއްވާފަ އެވެ. އަދި އެނގިހުރެ ހުއްދަނޫން ތަނަކަށް ވަނުމުގެ ކުށުގެ ދައުވާ ސާބިތުވުމުން ވަނީ 2 މަހާއި 12 ދުވަހުގެ ޖަލު ހުކުމެއް އިއްވާފަ އެވެ.
