ދިވެހިރާއްޖޭގެ ފުރަތަމަ ޑިވެލޮޕްމަންޓް ބޭންކް މިރޭ އިފްތިތާހުކޮށްފި އެވެ.
މިރޭ އިސްލާމިކް ސެންޓަރުގައި ބޭއްވި ޚާއްސަ ރަސްމިއްޔާތެއްގައި ޑިވެލޮޕްމަންޓް ބޭންކް އޮފް މޯލްޑިވްސް އިފްތިތާހުކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ. ރާއްޖޭގައި ފުރަތަމަ ފަހަރަށް ޑިވެލޮޕްމަންޓް ބޭންކެއް އުފެއްދެވުމަކީ ރައީސް ޑރ. މުއިއްޒުގެ ރިޔާސީ ވައުދެކެވެ.
ޑިވެލޮޕްމަންޓް ބޭންކްގެ ލައިންސަންސް ހޯދުމަށް އެމްއެމްއޭއަށް ހުށަހަޅާފައިވަނީ މިދިޔަ ޖުލައި މަހުގެ 25 ވަނަ ދުވަހު އެވެ. އެމްއެމްއޭއިން ލައިސެންސް ދީފައިވަނީ ނިދިޔަ އޮކްޓޯބަރު މަހުގެ ތެރޭގަ އެވެ.
ޑިވެލޮޕްމަންޓް ބޭންކް ގާއިމުކުރަނީ ޗާންދަނީމަގާއި އަމީރު އަހުމަދު މަގު ގުޅޭ ހަތަރުއަނގޮޅީގައި ހުންނަ އެލައިޑް ބިލްޑިންގެ ތިރީގަ އެވެ.
މި ބޭންކްގެ ސީއީއޯ އާއި ޗެއާޕާސަންގެ މަގާމަށް މިހާރު ވަނީ ބޭފުޅުން އައްޔަންކުރައްވާފަ އެވެ. އެގޮތުން، ބޭންކުގެ ސީއީއޯގެ މަގާމަށް އައްޔަންކުރައްވާފައިވަނީ އިނގިރޭސިވިލާތުގެ ނޮއެލް ގްރެގާ އެވެ. އަދި ޗެއާމަންގެ މަގާމަށް އައްޔަންކުރައްވާފައިވަނީ ސިންގަޕޫރުގެ އަރޫނީ ގުނިޓެލެކީ އެވެ.
މި ބޭންކް އުފެއްދުމުގެ އަސާސީ މަގްސަދަކީ ސަރުކާރުގެ ސިޔާސަތުތަކާ އެއްގޮތަށް ދެމެހެއްޓެނިވި އިޖްތިމާއީ އިގްތިސާދީ ތަރައްގީއަށް އިންވެސްޓްމަންޓްތައް ފަހިކޮށްދިނުމަށެވެ. މި ބޭންކު އުފެއްދުމުގެ އިތުރު އަމާޒަކީ ސިންޑިކޭޓެޑް ފައިނޭންސިން މެދުވެރިކޮށް ޕަބްލިކް ސެކްޓަރ އިންވެސްޓްމަންޓް ޕްރޮގްރާމްސް (ޕީއެސްއައިޕީ) އަށް ފައިސާ ދިނުމުގައި ހުރި ގޮންޖެހުންތައް ލުއިކޮށްދީ، ރާއްޖޭގެ ބޭންކިން ނިޒާމު މެދުވެރިކޮށް ބޭރު ފައިސާ ވަންނާނެހެން ދުނިޔޭގެ އިންވެސްޓަރުން ރާއްޖެއާއި ދޭތެރޭ ޝައުގުވެރި ކުރުވުމެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިކޮނޮމިކް މިނިސްޓަރު މުހައްމަދު ސައީދު އެމްއެމްއޭ ޑިވެލޮޕްމަންޓް ބޭންކް އޮފް މޯލްޑިވްސް ލިމިޓެޑް
