ހުޅުމާލެ ހޮސްޕިޓަލް ޓާޝަރީ ހޮސްޕިޓަލްގެ ދަރަޖައަށް ބަދަލުކޮށްފި އެވެ.
މިކަމަށްޓަކައި މިއަދު ބޭއްވި ހާއްސަ ރަސްމިއްޔާތެއްގައި އާ ހިދުމަތްތައް މި ހޮސްޕިޓަލުން ލިބޭނެ ކަން ހާމަކޮށްފައި ވެއެވެ.
މި ހޮސްޕިޓަލްގައި 10 އެނދުގެ ކްރިޓިކަލް ކެއާ ޔުނިޓްވެސް ހުޅުވާފައި ވެއެވެ. މި އެޑްވާންސްޑް އައިސީޔޫއިން ޒަމާނީ ފެންވަރުގެ އިމަޖެންސީ ފަރުވާ ލިބޭނެ އެވެ. މި ޔުނިޓް މީގެ ކުރީ ސަރުކާރެއްގައި ގާއިމުކުރެވުނު ނަމަވެސް، އެތަން ބޭނުންނުކުރުމުގެ ސަބަބުން އެތަނުގައި ތިބި އަގުބޮޑެތި ސާމާނުތައް ހަލާކުވެފައި ވެއެވެ.
ސްޓެރައިލް ޑިޕާޓްމެންޓްވެސް ގާއިމުކޮށްފައި ވެއެވެ. ސްޓެރައިލް މެޝިން ފަދަ އާ އާލާތްތައްވެސް މި ހޮސްޕިޓަލަށް ގެނެސްފައި ވެއެވެ. މި ތަނުގެ ބޭނުމަކީ ސިއްހީ އިންފެކްޝަންތައް ފެތުރުން ކުޑަކޮށް ރައްކާތެރިކަމާއިއެކީ ސްޓެރިލައިޒް ކުރުމުގެ މަސައްކަތް ކުރުމެވެ. މީގެ ކުރިން ލެވެލް 2 ގެ ދަރަޖައިގައި ހިންގާ މި ހޮސްޕިޓަލުގައި މިހާރު ވަނީ އެންއައިސީޔޫއެއްވެސް ގާއިމުކޮށްފަ އެވެ. މި އެންއިސީޔޫގައި 14 އެނދު ހުންނާނެ އެވެ. އަދި ނިއޯނޭޓަލް ކެއާ އާއި ފޮޓޯތެރަޕީވެސް ލިބެން ހުންނާނެ އެވެ.
އޮޕަރޭޝަން ތިއޭޓާ ކޮމްޕްލެކްސްއެއްވެސް ހުޅުމާލެ ހޮސްޕިޓަލްގައި ހަދާފައި ވެއެވެ. މިތަނުން ޒަމާނީ ފެންވަރަށް ބޮޑެތި އޮޕަރޭޝަންތައް ކުރެވޭނެ ކަމަށް މާލެ ސިޓީ ގްރޫޕް އޮފް ހޮސްޕިޓަލްސް އިން ބުނެފައި ވެއެވެ. އެގޮތުން އަންހެނުންގެ ބަލިތަކާއި ލޮލުގެ ބަލިތަކާއި ކަށީގެ ބަލިތަކުގެ އޮޕަރޭޝަންތަކާއި ޖެނެރަލް ސާޖަރީތައް މި ތިއޭޓަރުން ހެދޭނެ އެވެ.
މި ސަރުކާރުން ވަނީ އާބާދީ ބޮޑު ހުޅުމާލޭ ހޮސްޕިޓަލްގައި އެކި އެކި ހިދުމަތްތައް ނުލިބޭތީ އެކަން ހައްލުކުރުމަށް މަސައްކަތްކޮށްފަ އެވެ. އެގޮތުން ރޭ ސަރުކާރުން ވަނީ ދަރުމަވަންތަ ހޮސްޕިޓަލްވެސް އާ ހިދުމަތްތަކާއިއެކު ޓާޝަރީ ފެންވަރުގެ ހޮސްޕިޓަލްގެ ދަރަޖައަށް ބަދަލުކޮށް، އެކަން ފާހަގަކުރުމަށް ހާއްސަ ރަސްމިއްޔާތެއް ބާއްވާފަ އެވެ.
