މިނިސްޓްރީ އޮފް ސޯޝަލް އެންޑް ފެމިލީ ޑިވޮލޮޕްމަންޓް އިން ކުރިއަށްގެންދާ ”ހާލު ކިހިނެތް“ ޕްރޮގްރާމްގެ ދަށުން މިހާތަނަށް 8027 ގޭބީސީއަކަށް ޒިޔާރަތްކޮށްފައިވާ ކަމަށް އެ މިނިސްޓްރީން ހާމަކޮށްފި އެވެ.
މިނިސްޓްރީން ”އެކްސް“ ގައި މިއަދު ކުރި ޕޯސްޓެއްގައި ބުނީ އެ ޕްރޮގްރާމްގެ ދަށުން މާލެ ސަރަހައްދުން 3324 ގޭބީސީއަކާއި އަތޮޅު ތެރޭގެ 4703 ގޭބީސީއަކަށް ޒިޔާރަތްކޮށްފައިވާ ކަމަށެވެ. އަދި ރާއްޖޭގެ ހުރިހާ ރަށެއްގައި ދިރިއުޅޭ އާއިލާތަކުގެ ހާލަތު ދެނެގަތުމަށް އެ މިނިސްޓްރީން މިދިޔަ މެއި މަހު ފެށި އެ މަސައްކަތުގެ ތެރެއިން ދަތިތަކާއި ހާލު ދެނެގަނެ އެ ފަރާތްތަކުގެ ދަތިތަކަށް ހައްލެއް ހޯދުމަށް ގުޅިގެން މަސައްކަތް ކުރަން ނިންމާފައިވެ އެވެ.
އެ މިނިސްޓްރީން ވަނީ ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އަދި އާސަންދައިން ފާއިތުވެދިޔަ އަހަރެއްހާ ދުވަހު ހޯދާފައިވާ ކާމިޔާބީ ވެސް ޕޯސްޓްގައި ހިމަނާފަ އެވެ. އެގޮތުން އަންހެނުންގެ ސިއްހީ ދުޅަހެޔޮކަން އިތުރުކުރުމަށް އެންޑޯމެޓްރިއޯސިސް, ޕީސީއޯއެސް އަދި އިންފާރޓިލިޓީ ފަރުވާ އާސަންދަ ސްކީމް މެދުވެރިކޮށް ލިބޭނެ އިންތިޒާމު ހަމަޖެހިފައިވާކަމާއި އައިވީއެފްގެ ފަރުވާގެ ޝަރުތުހަމަވާ 100 ފަރާތަކަށް އެހީދިނުމަށް ނިންމާފައިވާކަން ވެސް ވަނީ ފާހަގަކޮށްފަ އެވެ.
ކޭސް ވޯކް ކުރުމަށް ގެނެވުނު ބަދަލުގެ ކުރިން ކޭސް ވޯކަރެއްގެ ޖުމްލަ ކޭސްތަކުގެ އަދަދަކީ 278 ނަމަވެސް އެ ނިޒާމަށް ގެނެވުނު ބަދަލާއެކު 6 މަސް ދުވަހުގެ ތެރޭގައި ކޭސް ވޯކަރެއްގެ ކޭސްތަކުގެ އަދަދު 80, 50 އަދި 23 ކޭހަށް ބަދަލުކުރެވިފައިވާ ކަމަށް ވެސް މިނިސްޓްރީން ވަނީ ބުނެފަ އެވެ.
