ރާއްޖޭގެ ހުރިހާ އަތޮޅެއްގައި އައިޑީކާޑާއި ޕާސްޕޯޓްގެ ހިދުމަތް ދިނުމުގެ މަގުޗާޓް އާންމުކޮށްފި އެވެ.
މިއަދު ހެނދުނު ބޭއްވި ހާއްސަ ރަސްމިއްޔާތެއްގައި މި މަގުޗާޓް އާންމުކުރައްވާފައިވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އާއި ހޯމް މިނިސްޓަރ އަލީ އިހުސާން އެވެ
މި ރަސްމިއްޔާތުގައި ވާހަކަދައްކަވަމުން މިނިސްޓަރ އިހުސާން ވިދާޅުވީ އަސާސީ ހިދުމަތެއް ކަމުގައިވާ އައިޑީކާޑާއި ޕާސްޕޯޓްގެ ހިދުމަތް އަތޮޅު ތެރެއިން ނުލިބުމަކީ ވަރަށް ބޮޑު ތަކްލީފަކަށް ވެގެންދިޔަ ކަމެއް ކަމަށެވެ. އަދި މި ތަކުލީފު ހައްލުކުރުމަށް ދިމާވާ ގޮންޖެހުމުގެ ސަބަބުން މިހާތަނަށް އެއްވެސް ސަރުކާރަކަށް މި ހިދުމަތް ފެށޭވަރު ވެފައިނުވާ ކަމަށް މިނިސްޓަރ ވިދާޅުވި އެވެ. މި ސަރުކާރުން ވެރިކަމާއި ހަވާލުވުމަށްފަހު ރައީސް ވަނީ އަތޮޅު ވެރިކަން ކުރާ ރަށްރަށުގެ އިތުރުން އެހެނިހެން ރަށްރަށުގައި މި ހިދުމަތް ލިބޭނެ ގޮތް ހެއްދެވުމަށް އިރުޝާދު ދެއްވާފައި ކަމަށް މިނިސްޓަރ ވިދާޅުވި އެވެ.
”ރައީސްގެ ރިޔާސީ ވައުދުފުޅެއް އެއީ ރައްޔިތުންނާ ގާތުން ރާއްޖޭގެ ހުރިހާ އަތޮޅަކުން އައިޑީކާޑު ޕްރިންޓް ކުރެވި ދޫކުރެވި އަދި އޭގެ އިތުރުން ޕާސްޕޯޓު ދޫކުރެވޭނެ ހިދުމަތް ފެށިގެން ދިއުމަކީ. ”މިގޮތުން އަޅުގަނޑުމެންގެ އައިޑީކާޑު ހަދަން ހަވާލުވެފައިވާ ޑިޕާޓްމަންޓުން، ނޭޝަނަލް ރަޖިސްޓްރޭޝަނުން ރާއްޖޭގެ އެއްވެސް ކަންކޮޅަކުން އެޕްލިކޭޝަނެއް އައިމަ އެ އެޕްލިކޭޝަން ޕްރޮސެސްކޮށްފައި ޕްރިންޓާ ހަމައަށް ދިޔައިމަ ހަމައެކަނި ޕްރިންޓް އޮޕްޝަން ދީފައި އޮތަރައިޒް ކުރެވޭ އައިޑީކާޑުތައް ޕްރިންޓް ކުރެވޭ ގޮތަށް އެ އަތޮޅުތަކަށް ފުރުސަތު ދީފައި އޮންނާނީ،“
މާލޭ ފިޔަވައި މިހާރު ޕާސްޕޯޓުގެ ހިދުމަތް ލިބޭ ތަންތަނުގެ ތެރޭގައި ހިމެނެނީ ހުޅުމާލޭ ފޭސް އެކަކާއި ފޭސް ދޭއްގެ އިތުރުން ވިލިމާލެ އާއި ލ. ފޮނަދޫ އަދި ދ. ކުޑަހުވަދޫ އެވެ. އަދި އައިޑީކާޑުގެ ހިދުމަތް ފަށާފައި ވަނީ ހުޅުމާލޭގެ ފޭސް އެކަކާއި ދޭއްގެ އިތުރުން ވިލިމާލެ އާއި ހދ. ކުޅުދުއްފުށީގަ އެވެ.
އަންނަ އަހަރު ތިރީގައިވާ ރަށްރަށުން މި ހިދުމަތް ލިބޭނެ ކަމަށް މިނިސްޓަރ އިހުސާން މައުލޫމާތު ދެއްވި އެވެ.
– ހއ. އިހަވަންދޫގައި އޮގަސްޓް 2025 ގައި ޕާސްޕޯޓު ހިދުމަތް އަދި އައިޑީކާޑު ހިދުމަތް މެއި މަހު ފަށާނެ.
– ހދ. މަކުނުދޫގައި ޕާސްޕޯޓު ހިދުމަތް ސެޕްޓެމްބަރުގައި އަދި އައިޑީކާޑު ހިދުމަތް ފެބްރުއަރީގައި ފަށާނެ.
– ށ. ފުނަދޫ ޑިސެމްބަރުގައި އަދި ށ. މިލަންދޫގައި ޖުލައި މަހުގެ ޕާސްޕޯޓު ހިދުމަތް ފަށާނެ. އަދި ޖޫން މަހު އައިޑީކާޑު ހިދުމަތް ފަށާނެ.
– ނ. އަތޮޅުގައި ޖުލައި މަހުގެ ޕާސްޕޯޓާއި އައިޑީކާޑު ހިދުމަތް ފަށާނެ.
– ރ. އަތޮޅުގައި މެއި މަހު ޕާސްޕޯޓާއި އައިޑީކާޑު ހިދުމަތް ފަށާނެ.
– ބ. އަތޮޅުގައި ޕާސްޕޯޓު ހިދުމަތް ޑިސެމްބަރުގައި އަދި އައިޑީކާޑު ހިދުމަތް އޮގަސްޓުގައި ފަށާނެ.
– ޅ. އަތޮޅުގައި ޕާސްޕޯޓު ހިދުމަތް އޭޕްރީލްގައި އަދި އައިޑިކާޑުގެ ހިދުމަތް ސެޕްޓެމްބަރުގައި ފަށާނެ.
– އއ އަތޮޅުގައި ޕާސްޕޯޓު ސެޕްޓެމްބަރުގައި އަދި އައިޑީކާޑު އޮކްޓޫބަރުގައި ދޫކުރާނެ.
– އދ. އަތޮޅުގައި މާޗު މަހު ޕާސްޕޯޓު އަދި އައިޑީކާޑު އޮގަސްޓުގައި ދޫކުރާނެ.
– ވ. އަތޮޅުގައި ޕާސްޕޯޓު ޑިސެމްބަރުގައި އަދި އައިޑީކާޑު ނޮވެމްބަރުގައި ދޫކުރާނެ.
– މ އަތޮޅުގައި ޕާސްޕޯޓު ހިދުމަތް އޮގަސްޓުގައި އަދި އައިޑީކާޑު އޮކްޓޫބަރުގައި.
– ފ. އަތޮޅުގައި ޕާސްޕޯޓު ހިދުމަތް ޖޫން މަހު އަދި އައިޑީކާޑު ސެޕްޓެމްބަރުގައި.
– ތ. އަތޮޅުގައި ޕާސްޕޯޓު ފެބްރުއަރީގައި އަދި އައިޑީކާޑު ޖުލައި މަހުގެ ތެރޭގައި.
– ގއ. ގައި ޕާސްޕޯޓު ހިދުމަތް ޖެނުއަރީގައި
– ސ. ހުޅުމީދޫގައި ޕާސްޕޯޓު ހިދުމަތް ނޮވެމްބަރުގައި އަދި އައިޑީކާޑު ހިދުމަތް އޭޕްރީލްގައި.
މީގެ ތެރެއިން ބައެއް ރަށްރަށުގައި މި ހިދުމަތްތައް މިހާރުވެސް ދެމުންދާ ކަން ފާހަގަކޮށްލަން ޖެހެ އެވެ.
ހޯމް މިނިސްޓަރު އަލީ އިހުސާން ރައީސުލްޖުމްހޫރިއްޔާ ޑރ. މުހައްމަދު މުއިއްޒު
