ހުޅުމާލެ ވަން އެވެނިއުގެ އެޕާޓްމެންޓަކަށް ވަދެ މުދަލަށް ގެއްލުންދީ، އަދި އެތަނުގައި ތިބި ފަރާތްތަކަށް ބިރުދެއްކި މައްސަލައެއް ދިވެހި ފުލުހުންގެ ޚިދުމަތުން ތަޙުޤީޤުކުރަން ފަށައިފި އެވެ.
ފުލުހުން މީޑިއާތަކަށް މިއަދު ފޮނުވި މެސެޖެއްގައި ބުނެފައިވާ ގޮތުގައި، މި މައްސަލަ ރިޕޯޓުކޮށްފައިވަނީ މިއަދު ހެނދުނު 6:32 ހާއިރު އެވެ. އަދި މި މައްސަލައާ ގުޅިގެން ބަލަންޖެހޭ ކަންކަން ފުލުހުން ބަލަމުން އަންނަ ކަމަށް އެ އިދާރާއިން މަޢުލޫމާތު ދީފައިވެ އެވެ.
ސޯޝަލް މީޑިއާގައި ދައުރުވަމުންދާ މަޢުލޫމާތުތަކަށް ބަލާއިރު، މިއަދު ހެނދުނު 7:00 ހާއިރު ވަން އެވެނިއު އެޕާޓްމެންޓަކަށް ވަދެ ދެ މީހަކު މަރުގެ އިންޒާރު ދީފައިވާ ކަމަށް ބުނެފައިވެއެ ވެ. މި ދެ މީހުންގެ ނަން ވެސް ސޯޝަލް މީޑިއާގައި ޝާއިޢުކޮށްފައިވާ ޕޯސްޓުގައި ހިމަނާފައިވެ އެވެ.
މި ދެ މީހުން ވަނީ 5 އަހަރު ނުފުރޭ ކުޑަކުއްޖަކާއި 13 އަހަރުގެ ކުއްޖަކު ނިދާފައި އޮއްވާ ނަގައި، އެ ކުދިންގެ ކުޅޭ އެއްޗެހި އުކާލައި، އަދި އެ ކުދިންގެ މައިންބަފައިންނާއި އެއްބަނޑު އެއްބަފާ ކުދިންނަށް މަރުގެ އިންޒާރު ދީފަ އެވެ. މި ހާދިސާއާ ގުޅިގެން ތުއްތު ކުއްޖާ މިހާރުވެސް ހުރީ ނަފްސާނީ ބިރުވެރިކަމެއްގެ ތެރޭގައި ކަމަށާއި، މީހަކު ގޮވާލިޔަސް އެ ކުއްޖާ ސިއްސައިގެން ގޮސް ރޯން ފަށާ ކަމަށް ވެސް ބުނެފައިވެ އެވެ.
