އިހްސާންކަމަކީ އިސްލާމްކަމާއި އީމާންކަމަށް ފަހު، މުއުމިނެއްގެ ހަޔާތުގައި ނުހަނު މަތިވެރި ދަރަޖައެއް ލިބިގެންވާ ކަމެއް ކަަމަށް މިއަދުގެ ހުކުރު ހުތުބާގައި ބުނެފި އެވެ.
ހުތުބާގައި ބުނީ އިހްސާންކަމަކީ އިހްލާސްތެރިކަމާއި ތެދުވެރިކަމާ އަދި ހެޔޮކޮށް ހިތުން ކަަމަށެވެ. އެއީ އިސްލާމްކަމާއި އީމާންކަމަށް ފަހު، މުއުމިނެއްގެ ހަޔާތުގައި ނުހަނު މަތިވެރި ދަރަޖައެއް ލިބިގެންވާ ކަމެއް ކަމަށެވެ. އިހްސާންކަމުގެ އަނެއް މާނައަކީ ކަމޭހިތުމާއި އޯގާވެރިވުމާ އަދި ހެޔޮކޮށް ހިތުން ކަމަށެވެ.
އިހްސާންކަމަކީ މުކައްލަފެއްގެ އެންމެހާ އަމަލުތަކުގައި ހުރުން ލާޒިމު ސިފައެއް ކަމަށާއި، އޭނާ އެހެންމީހުންނާ ކުރާ މުއާމަލާތުގައްޔާއި އަމިއްލަ ނަފުސަށް ކުރާ މުއާމަލާތު ކަމަށެވެ. އަދި އޭނާގެ މާލީ މުއާމަލާތާއި އަބުރު ހިފެހެއްޓުމާއި އިލްމު އުނގެނުމުގެ އިތުރުން އެންމެހާ އަމަލުތަކުގަ އެވެ.
ހުކުރު ހުތުބާގައި ބުނި ގޮތުގައި އަޅުކަމުގައި އިހްސާންތެރިކަމަކީ މާތް ﷲ ގެ އެއްކައުވަންތަކަން ގަބޫލުކޮށް، އެކަލާނގެ އާ އެހެން ފަރާތެއް ބައިވެރިނުކުރުން ކަަމުގަ އެވެ. ހުރިހާ ކަމެއް މިންވަރުކުރައްވަނީ މާތް ﷲ ކަން ގަބޫލުކޮށް، މިންވަރަށް އީމާންވުމަކީ ވެސް އިހްސާންކަމުގެ ތެރެއިންވާ ކަމެއް ކަމުގަ އެވެ.
ހުތުބާގައި ބުނެފައިވަނީ، އިހްސާންކަމުގެ ތެރޭގައި އަޅުތަކުންގެ މައްޗަށް އިހްސާންތެރިވުން ހިމެނޭ ކަމަށެވެ. އޭގެތެރެއިން އެންމެ އައުލާކަން ބޮޑު ބަޔަކީ މައިންބަފައިން ކަމަށެވެ. ގާތްތިމާގެ މީހުންނާ އޮންނަ ރަހިމުގެ ގުޅުން ދެމެހެއްޓުންވާ ކަމަށެވެ. އެއީ އުމުރާއި ރިޒްގުގައި ބަރަކާތް ލައްވައި، މަރުމަތި އަމާންވާނޭ ކަމެއް ކަަމަށެވެ. ހަމައެފަދައިން ރަހިމުގެ ގުޅުން ދެމެހެއްޓުމަކީ ސުވަރުގެ ވަނުމަށް މަގުފަހިވާ ކަމެއް ކަަމަށެވެ.
ގާތްތިމާގެ މީހުން ފިޔަވައި ޔަތީމުންނާއި މިސްކީނުންނާއި ހަނގުރާމައިގެ އަސީރުން ފަދަ ނިކަމެތީންނަށް އެހީތެރިކަން ފޯރުކޮށްދީ، ކާންދީ އުޅުމަކީ ވެސް އިހްސާންތެރިކަމުގެ ތެރޭގައި ހިމެނޭ މުހިންމު ބައެއް ކަމަށް ވެސް ހުތުބާގައި ބުނެފައިވެ އެވެ.
