މަސްތުވާތަކެތީގެ ޚިދުމަތް ދޭ 48 ތަނެއް ބަންދުކޮށްފައިވާ ކަމަށް ދިވެހި ފުލުހުންގެ ޚިދުމަތުން މިއަދު ބުނެފި އެވެ.
މިކަން ހާމަކޮށްފައިވަނީ މިއަދު ބޭއްވި ނޫސްވެރިންގެ ބައްދަލުވުމެއްގަ އެވެ.
ފުލުހުން ބުނިގޮތުގައި، މާލޭގައި ކެފޭ އުސޫލުން މަސްތުވާތަކެތީގެ ވިޔަފާރި ކުރަމުންދާ ތަންތަން ބަންދު ކުރުމުގެ މަސައްކަތް ފަށާފައިވެ އެވެ. އަދި މަސްތުވާތަކެތީގެ މުޢާމަލާތް އާންމުކޮށް މާލޭގައި ހިންގާ ކަމަށް ފާހަގަ ކުރެވޭ ތަންތަނުގައި ސްޓެޓިކް ޑިއުޓީ ކުރަން ފަށާފައިވާ ކަމަށްވެސް ފުލުހުން ހާމަކުރި އެވެ.
ފުލުހުންގެ ޚިދުމަތުގެ ފަރާތުން ބުނި ގޮތުގައި، ”މަސްތުވާތަކެއްޗަށް ޖެހިފައިވާ ފަރާތްތަކާއި، މަސްތުވާތަކެތި ބޭނުންކުރުމުގެ ނިޔަތުގައި ސަލާންޖަހާ ފަރާތްތަކާއި، ތަކުރާރުކޮށް ޖިނާއީ ކުށްތައް ކުރުމުގައި ހަރަކާތްތެރިވާ ފަރާތްތައް ފަރުވާގެ ނިޒާމަށް ވެއްދުމަށްޓަކައި ކަމާގުޅުންހުރި ފަރާތްތަކާއި އެކު މަސައްކަތް ކުރަމުންދާކަން“ ކަމަށެވެ. މިގޮތުން، އެން.ޑީ.އޭ އަށް ފަރުވާ ނިޒާމަށް ވެއްދުމަށް 49 ފަރާތެއް ހަވާލު ކޮށްފައިވާ ކަމަށް ފުލުހުން ބުންޏެވެ.
މީގެއިތުރުން، ބަނގުރަލުގެ ވަގު ވިޔަފާރި ހުއްޓުވުމަށްޓަކައި ކަމާގުޅުންހުރި ފަރާތްތަކާއި އެކު ގިނަ މަސައްކަތްތަކެއް ކުރެވެމުން ގެންދާ ކަމަށްވެސް ފުލުހުން ހާމަކުރި އެވެ. އެގޮތުން، ސަފާރީތަކަށް އަމާޒުކޮށްގެން މިނިސްޓްރީ އޮފް ޓޫރިޒަމްއާއި، ކަސްޓަމްސް އަދި ފުލުހުން ހިމެނޭގޮތަށް އިންސްޕެކްޝަންތައް ކުރެވެމުން ގެންދާ ކަމަށާއި، މިހާތަނަށް 58 ސަފާރީއެއް ބަލައި ފާސްކޮށްފައިވާ ކަމަށް ފުލުހުން ބުންޏެވެ.
