ކަނޑޫފާ ގަސްތައް ގިނަ ސަރަހައްދެއް ކަމުގައިވާ ދަށްފަޅުގައި އީކޯ-ޕާކެއް ތަރައްގީކުރަން އުޅޭ ކަމަށް ށ. ފުނަދޫ ކައުންސިލުން ބުނެފި އެވެ.
ރާއްޖޭގައި ތަރައްގީކުރާ ޓޫރިސްޓް ހޮޓަލަކާއި އެޓްރެކްޝަންތަކާއެކު އީކޯ ޕާކެއް ސާވޭކޮށް ޑިޒައިން ކުރާނެ ފަރާތެއް ހޯދުމަށް ފުނަދޫ ކައުންސިލުން އިއްޔެ އިއުލާންކޮށްފައިވެ އެވެ.
ކައުންސިލުން ކުރި އެ އިއުލާނުގައި ވަނީ ޝައުގުވެރިވާ ފަރާތްތަކުން ނޮވެމްބަރު 19 ވާ އަންގާރަ ދުވަހުގެ މެންދުރު 13:00 ގެ ކުރިން އީމެއިލް މެދުވެރިކޮށް ޝައުގުވެރިކަން ފާޅުކުރުމަށް އެދިފަ އެވެ. އިއުލާންގައިވާ ގޮތުގެ މަތިން ކައުންސިލުން މި މަޝްރޫއު ހަވާލުކުރާނީ ކޮންޓްރެކްޓް އުސޫލުން ހަ މަސް ދުވަހުގެ ތެރޭގައި ނިންމުމަށެވެ.
ފުނަދޫގެ ދައްފަޅަކީ ގުދުރަތީ ގޮތުން އުފެދިފައިވާ ކަނޑޫފާތައް ގިނަ ސަރަހައްދެކެވެ. ހިޖުރަކުރާ މޫސުމުގައި ރާއްޖެ އިން އާންމުކޮށް ނުފެންނަ ދޫނިތައް މި ސަރަހައްދަށް ދަތުރު ކުރެ އެވެ.
ކައުންސިލުން ބުނީ މި ނިންމުމުގެ ސަބަބުން އެ ސަރަހައްދުގެ ބޭނުން ރަނގަޅު ގޮތުގައި ހިފޭނެ އެވެ.
