ޑޮލަރު މާރުކުރުމުގެ ގަވާއިދުގެ ދަށުން އެންމެ ރިސޯޓެއް ފިޔަވައި ހުރިހާ ރިސޯޓަކުން ރަޖިސްޓްރީވެއްޖެ ކަމަށް މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ އިން ބުނެފި އެވެ.
އެމްއެމްއޭ އިން މި ސިޔާސަތު ތައާރަފް ކުރީ ގައުމީ ބޭންކް، ބޭންްކް އޮފް މޯލްޑިވްސްގައި ޑޮލަރުގެ ދަތިކަން ކުރިމަތިވާ މައްސަލަ ހައްލުކުރުމަށެވެ. އެ ސިޔާސަތުގައިވާ ގޮތުން ކެޓަގަރީ އޭ ރިސޯޓްތަކާއި ހޮޓަލްތަކާއި ޓޫރިސްޓް އުޅަނދުތަކުން ކޮންމެ ގެސްޓް ޗެކްއިން އަކަށް ލޯކަލް ބޭންކަކަށް 500 ޑޮލަރު ޖަމާކޮށް ބަދަލުކުރަން ޖެހެ އެވެ. މީގެ އިތުރުން ގެސްޓް ހައުސް ފަދަ ކެޓަގަރީ ބީގެ ތަންތަނުން ގެސްޓަކަށް 25 ޑޮލަރު ޖަމާކުރަން ޖެހެ އެވެ. މި އާ ސިޔާސަތަށް އަމަލުކުރަން ފެށީ އޮކްޓޯބަރު މަހުގެ އެއްވަނަ ދުވަހު އެވެ.
އެގޮތަށް އަމަލުކުރުމަށް މަރުކަޒީ ބޭންކުން އޮންލައިންކޮށް ރަޖިސްޓްރޭޝަން ޕޯޓަލްއެއް ގާއިމްކޮށްފައިވާއިރު، ރާއްޖޭގައި ހިންގާ 174 ރިސޯޓުގެ ތެރެއިން 173 ރިސޯޓުން ވަނީ ސޮއިކޮށްފަ އެވެ. މި މައުލޫމާތު ހާމަކޮށްފައިވަނީ ރާއްޖޭގެ އެންމެ ބޮޑު އެއް ޓޫރިޒަމް ކުންފުނި ކަމަށްވާ ޗަމްޕާ ބްރަދާސްގެ ވެރިޔާ މުހައްމަދު މޫސާ (އުއްޗު) އާ ސިޔާސަތު ސަސްޕެންޑް ކުރުމަށް އެދުމާ ގުޅިގެން ނެވެ.
އެ ސިޔާސަތާ ގުޅޭ ގޮތުން ބައެއް ރިސޯޓުތަކުން ޝަކުވާ ލިބިފައިވާ ކަމަށް މަރުކަޒީ ބޭންކުން ވަނީ އިއުތިރާފުވެފަ އެވެ. ނަމަވެސް ޝަކުވާގެ އަދަދެއް ހާމައެއް ނުކުރެ އެވެ.
ވަކިން ހާއްސަކޮށް މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)ގެ އިސް ބޭފުޅުންގެ މެދުގައި މި ސިޔާސަތާ ދެކޮޅުވެރިކަން ވަނީ ވަރުގަދަވެފަ އެވެ. ނަމަވެސް އާންމުންގެ އަޣުލަބިއްޔަތު ގަބޫލުކުރާ ގޮތުގައި މި ނިންމުމަކީ ގައުމަށް ފައިދާހުރި ނިންމުމެކެވެ. އަދި ރާއްޖޭގެ އިގްތިސާދު އާލާކުރުމަށް އަޅަންޖެހޭ ފިޔަވަޅެއްވެސް މެއެވެ.
މި ސިޔާސަތުގެ ސަބަބުން ބޭންކިން ނިޒާމަށް ޑޮލަރު އިތުރުވެ، ރާއްޖޭގެ ރިޒާވް ބޮޑުވާނެ ކަމަށް ބެލެވެ އެވެ. ތަޖުރިބާކާރުން ބުނާ ގޮތުގައި މި ފިޔަވަޅަކީ ދިވެހި ރުފިޔާ ހަރުދަނާކޮށް ގައުމީ އިގްތިސާދުގެ ހަމަޖެހުމަށް އެއްބާރުލުން ދޭނެ ކަމެއް ކަމަށް ބެލެވެ އެވެ.
