މުޖުތަމައަށް އެތެރެވުމުގެ ކުރިން 333 މިލިއަން ރުފިޔާގެ މަސްތުވާތަކެތި އަތުލައިގަނެވިފައިވާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.
މިނިސްޓަރު އިހުސާން މިހެން ވިދާޅުވީ ދައުލަތުގެ މީޑިއާއިން ގެނެސްދިން ހަފްތާ 52 ޕްރޮގްރާމުގައި ވާހަކަ ދައްކަވަމުން ނެވެ.
އިހުސާން ވިދާޅުވީ މިއީ ޖުމުލަ 183 ކިލޯގެ މަސްތުވާތަކެތި ކަމަށެވެ.
ޑްރަގްސްގެ ކަންތައްތަކަށް ބަލާއިރު 183 ކިލޯގެ ޑްރަގްސް އަޅުގަނޑުމެން އިންޓަސެޕްޓް ކުރެވިއްޖެ. އެއީ 333 މިލިއަން ރުފިޔާގެ ޑްރަގްސް ގާތްގަނޑަކަށް. މުޖުތަމައަށް ނެރުމުން އަޅުގަނޑުމެން ވާނީ ބްލޮކްކޮށްފަ.
މީގެ އިތުރުން ޕޮޓް އޮފް އެންޓްރީތައް އިތުރަށް ސެކިއާކުރުމަށް ފިޔަވަޅުތައް އަޅާފައިވާކަމަށްވެސް މިނިސްޓަރު ވިދާޅުވި އެވެ.
މިނިސްޓަރު އިހުސާން ވަނީ ޖަލު ތެރެއިން ހިންގާ ސްކޭމް ކޯލްތަކާއި ޖަލުގައި މަސްތުވާތަކެތި ގެންގުޅޭ މައްސަލައާ ދެކޮޅަށް ކުރިއަށް ގެންދިޔަ އޮޕަރޭޝަނަށްވެސް އަލި އަޅުއްވާލައްވާފަ އެވެ. އެގޮތުން އެ އޮޕަރޭޝަންގައި ޖަލު އޮފިސަރުންތަކެއް މިކަމުގައި ހަރަކާތްތެރިވިކަން ފާހަގަ ކުރެވުމުން ވަކި މީހެއްގެ މޫނަކަށް ކަނދުރާއަކަށް ނުބަލާ އެ މީހުންނަށް ފިޔަވަޅު އަޅާފައިވާކަން އިހުސާން ފާހަގަ ކުރެއްވި އެވެ.
