މޯލްޑިވްސް ޑިމޮކްރެޓިކް ޕާޓީ (އެމްޑީޕީ) އިން 12 ވަނަ ދުވަހުގެ ރޭ އާޓިފިޝަލް ބީޗުގައި ބޭއްވި ޖަލްސާއަށް ދިޔަ މީހުންގެ ތެރެއިން ދެބައިކުޅައެއްބައި މީހުންނަކީ ބޭރު މީހުން ކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އަދި ކޮންގުރެސް ޕާޓީގެ ޕީޖީ ލީޑަރު އިބްރާހީމް ފަލާހު ވިދާޅުވެއްޖެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން ފަލާހު ވިދާޅުވީ، ”އާޓިފިޝަލް ބީޗުގައި ބާއްވައިފި ޖަލްސާއެއް، ތެދެއް އެއީ، ޖަލްސާއެއް އެއީ، ގޮނޑިހުރި އެތާނގަ، އެކަމް ބައްލަވާލައްވާ އެދިޔަ 300 އެއްހާ މީހުންގެ ތެރޭގައި ދެބައިކުޅަ އެއްބައި މީހުންނަކީ ބޭރުމީހުންނޭ ރައީސް، ދިވެހިންނެއް ނޫން އެއީ“ ކަމަށެވެ.

މީގެއިތުރުން، އެމްޑީޕީ އިން 3000 އެތައް ޕްރޮޖެކްޓެއް 2024 ވަނަ އަހަރުގެ ބަޖެޓުގައި ހިމަނާފައިވާ ކަމަށް ފަލާހު ފާހަގަކުރެއްވި އެވެ. އެހެންނަމަވެސް، އެމީހުން އެކަން ކޮށްފައި ވަނީ ރާއްޖޭގައި އެއްމަހުގެ ވިހާ ކުއްޖާގެ ސިކުނޑިއަށްވެސް އޮޅުންފިލާވަރަށް ކަމަށް އޭނާ ވިދާޅުވި އެވެ.

ފަލާހު އިތުރަށް ވިދާޅުވީ، އިނގުރައިދޫ ދާއިރާގެ 5 ރަށުގައި މަޝްރޫޢުތައް ހިމެނިފައިވާ ކަމަށާއި، އެމްޑީޕީގެ ދައުރު ނިމެން އެއް އަހަރަށް ވުމުން މަސައްކަތް ފަށާފައިވާ ކަމަށެވެ. ”މުހިންމީ އެ މަޝްރޫޢުތައް ފެށުންތޯ، ނުވަތަ ފަށާ މަޝްރޫޢު ނިންމުންތޯ، މިއީ ސުވާލަކީ ދިވެހި ރައްޔިތުން ކުރާ“ ކަމަށް ފަލާހު ވިދާޅުވި އެވެ.

ފަލާހު އިތުރަށް ވިދާޅުވީ، ދިވެހި ރައްޔިތުންނަށް މުހިންމުވަނީ ރަށެއްގައި ކުރަން ހުންނަ ހުރިހާ މަސައްކަތެއް ފެށުން ނޫން ކަމަށާއި، ރައްޔިތުންނަށް މިއަދު މުހިންމުވަނީ އެ ރަށްރަށުގެ ރައްޔިތުންނަށް އެންމެ މުހިންމު މަޝްރޫޢުތައް ފަށައި ނިންމުން ކަމަށެވެ.

ރައްޔިތުންގެ މަޖިލިސް އެމްޑީޕީ ޕީއެންސީގެ ޕީޖީ ލީޑަރު އިބްރާހިމް ފަލާހު