މޯލްޑިވްސް ޕޯޓްސް ލިމިޓެޑް (އެމްޕީއެލް)އިން ވޯޓާ ބަންކަރިންއަށް ބޭނުންކުރާނެ ފެން ބާޖެއް ގެނެސްފި އެވެ.

މި މަޢުލޫމާތު ހިއްސާކުރެއްވީ އެމްޕީއެލްގެ ސީއީއޯ، މުޙައްމަދު ވަޖީހު އިބްރާހިމް އިއްޔެ ފޭސްބުކްގައި ކުރެއްވި ޕޯސްޓެއްގަ އެވެ.

ވަޖީހުގެ ޕޯސްޓުގައި ވިދާޅުވެފައިވަނީ، ރާއްޖޭގެ އިޤްތިޞާދު ހަރުދަނާ ކުރެއްވުމުގެ ގޮތުން، އިޤްތިޞާދީ އައު ޞިނާޢަތްތައް އުފެއްދެވުމުގެ މަސައްކަތްތައް ފެށްޓެވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަމަށެވެ. އެގޮތުން ރައީސްގެ ވެރިކަމަށް އެއް އަހަރު ނުފުރެނީސް އިޤްތިޞާދަށް ދިރުން ގެނެސްދޭނޭ މުހިންމު މަސައްކަތްތަކެއް ފެށްޓެވި އިރު، އޭގެ ތެރެއިން މުހިންމު އެއްކަމަކީ އިންޓަރނޭޝަނަލް އޯފްޝޯ ބަންކަރިންގގެ ޚިދުމަތް ކަމަށް އޭނާ ފާހަގަކުރެއްވި އެވެ.

ވޯޓަރ ބަންކަރިންގ ޚިދުމަތަށް އެމް.ޕީ.އެލްއިން ހެދި ފެން ބާޖް ވަނީ އިއްޔެ ތިލަފުށި ޑޮކްޔާޑުން ބާލައިފަ އެވެ. ޖުމްލަ 200 ޓަނުގެ ފެން ރައްކާކުރެވޭ މި ފެން ބާޖް ބޭނުންކުރާނީ އުތުރުގައި ވޯޓަރ ބަންކަރިންގ ޚިދުމަތް ފޯރުކޮށްދިނުމަށެވެ.

މި ޚިދުމަތް ފެށީ މިދިޔަ ސެޕްޓެމްބަރ މަހުގެ 19 ވަނަ ދުވަހުގަ އެވެ. ވޯޓަރ ބަންކަރިންގ ޚިދުމަތަށް ފުރަތަމަ ބޭނުން ކޮށްފައި ވަނީ، ކޮޅުވެއްޓި އެއްގައި ކަޅު ހަން ބަހައްޓައިގެން ނެވެ. އޭގެ ފަހުން ދެމަސް ދުވަސް ނުވަނީސް، ވޯޓަރ ބަންކަރިންގ އަށް ތައްޔާރު ކުރި ”ފެން ބާޖު“ ޚިދުމަތަށް ނެރެވިފައިވާ ކަމަށް ވަޖީހުގެ ޕޯސްޓުގައި ވިދާޅުވެފައިވެ އެވެ. މިއީ ތިލަފުށީގައި އޮންނަ އެމްޕީއެލް ގެ ޑޮކުޔާޑުގައި، އެމްޕީއެލް އިން ތައްޔާރު ކުރި ބާޖެކެވެ.

ވަޖީހު ވިދާޅުވީ މީގެ ފަހުން ވޯޓަރ ބަންކަރިންގ އަށް ބޭނުން ކުރާނީ މި ބާޖު ކަމަށެވެ. މިބާޖުގެ ޚިދުމަތް ފުރިހަމަ ކުރުމަށްޓަކައި ލަސްތަކެއް ނުވެ، ބާޖުގައި ފެން ޕްލާންޓެއް ބަހައްޓައި، ބާޖުގައި ފެން އުފައްދައި ބޭނުން ކުރަން ފެށޭނެވަރު ވާނެ ކަމަށްވެސް ވަޖީހު ވިދާޅުވި އެވެ.