އަހަރީ ސަބްސިޑީގެ ގޮތުގައި 646 މިލިއަން ޑޮލަރު ދެމެހެއްޓެނިވިއެއް ނޫން ކަމުގައި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެ އެެވެ.

މިނިސްޓަރ މިގޮތަށް ވިދާޅުވީ ރޭ ދައުލަތުގެ މީޑިއާގެ ޕްރޮގްރާމެއްގައި ދެއްވި ހާއްސަ އިންޓަވިއުއެއްގަ އެވެ.

ކުރިއަށް އޮތް ބަޖެޓުގައި ސަބްސިޑީ ނިޒާމު އޯވަހޯލްކޮށް، ދައުލަތުގެ ކުންފުނިތަކުން ދޭ ސަޕޯޓް އެންމެ ނާޒުކު އާބާދީތަކަށް ދޭ ސީދާ އެހީތެރިކަމަށް ބަދަލުކުރުމަށް މިނިސްޓަރ ވިދާޅުވި އެވެ.

މި ޕްރޮގްރާމްގައި ވާހަކަދައްކަވަމުން ދައުލަތުގެ ގިނަ ކުންފުނިތަކަކީ ސަރުކާރުގެ ސަބްސިޑީތަކަށް ވަރަށް ބޮޑަށް ބަރޯސާވެފައިވާ ކުންފުނިތަކެއް ކަމަށާއި، އެ ކުންފުނިތަކުން އަމިއްލައަށް އާމްދަނީ ހޯދުމަށް އުނދަގޫވާ ކަމަށެވެ. މިނިސްޓަރު ވަނީ ދައުލަތަށް ބޮޑު ހަރަދެއްކޮށްގެން ތެލާއި ކަރަންޓް ފަދަ އަސާސީ ހިދުމަތްތަކަށް ސަބްސިޑައިޒް ކުރާ މިހާރުގެ ނިޒާމުގައި ހުރި ނާކާމިޔާބީތަކަށް އަލިއަޅުވާލައްވާފަ އެވެ.

މިކަން ހައްލުކުރުމަށްޓަކައި ސަރުކާރުން ރާވާފައިވަނީ ސަބްސިޑީތަކަށް މާ ފައިދާހުރި ގޮތެއްގައި އަމާޒުކޮށްގެން، އެ ސަބްސިޑީތަކުގެ ފައިދާ އެންމެ ބޭނުންވާ ފަރާތްތަކަށް ލިބޭނެ ގޮތް ހެދުމަށެވެ. މި ބަދަލުގެ ސަބަބުން އަހަރަކު 129.4 މިލިއަން ޑޮލަރު ސަލާމަތް ކުރެވޭނެ ކަމަށް މިނިސްޓަރ ލަފާކުރެއްވި އެވެ. އަދި ދައުލަތުގެ ކުންފުނިތައް ސްޓްރީމްލައިންކޮށް، އެ ކުންފުނިތައް އެއްކޮށް، ނުވަތަ ޕާފޯމަންސް ދަށް ކުންފުނިތައް އުވާލައި، ޒަރޫރީ ހިދުމަތްތައް ފޯރުކޮށްދޭ ކުންފުނިތަކަށް ހާއްސަ ގާނޫނެއް އެކުލަވާލުމަށް ވެސް ސަރުކާރުން ރާވާފައިވެ އެވެ.

ބައިނަލްއަގްވާމީ މާލީ އިދާރާތަކުން މި ބަދަލަށް ވަކާލާތު ކުރަމުން އަންނައިރު، މިހާރުގެ ނިޒާމުގެ ސަބަބުން މުޖުތަމައުގެ މުއްސަނދި ފަރާތްތަކަށް ނިސްބަތުން ބޮޑު ފައިދާއެއް ލިބޭކަން ފާހަގަކުރައްވާފައި ވެއެވެ. ވޯލްޑް ބޭންކުން ދާދިފަހުން ނެރުނު ރިޕޯޓެއްގައި ބުނެފައިވާ ގޮތުގައި ދިވެހިންގެ އެންމެ މުއްސަނދި 40 އިންސައްތަ މީހުންނަށް ސަބްސިޑީގެ 43 އިންސައްތަ ލިބޭއިރު އެންމެ ފަގީރު 10 އިންސައްތައަށް ލިބެނީ އެންމެ 8 އިންސައްތަ އެވެ. ރާވާފައިވާ އިސްލާހުތަކުގެ މަގުސަދަކީ މި ކަން އިސްލާހުކޮށް، ސަބްސިޑީ އެންމެ ބޭނުންވާ ފަރާތްތަކަށް ސަބްސިޑީ ފޯރުކޮށްދިނުމެވެ.

މިނިސްޓަރު ޑރ. އަބްދުﷲ މުއްތަލިބު މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ