ބޮޑެތި ގައުމުތަކުން ބޭނުން ނުކުރާ ސްޕެޝަލް ޑްރޯވިން ރައިޓްސް (އެސްޑީއާރް) ކުދި ޖަޒީރާތަކަށް ދިނުމަށް އެންވާރަމެންޓް މިނިސްޓަރ ޠާރިޤު އިބްރާހީމް ގޮވާލައްވަައިފި އެވެ.

މިނިސްޓަރ މިގޮތަށް ގޮވާލެއްވީ މިހާރު އަޒަރްބައިޖާންގެ ބަކޫގައި ކުރިއަށްގެންދާ ކޮޕް 29 ގެ ހަވާސާގެ ތެރެއިން ބޭއްވި ބައްދަލުވުމެއްގަ އެވެ. މި ބައްދަލުވުމުގައި މިނިސްޓަރ ވާހަކަދެއްކެވީ މީގެ ހަ މަސް ކުރިން އިފްތިތާހު ކުރި ސިޑްސް (ސްމޯލް އައިލެންޑް ޑިވެލޮޕިން ސްޓޭޓްސް) ޑެޓް ސަސްޓެއިނަބިލިޓީ ސަޕޯޓް ސާވިސްއަށް އިޝާރާތްކުރައްވަމުން ނެވެ.

އެސްޑީއާރްއަކީ ބައިނަލްއަގްވާމީ މަނިޓަރީ ފަންޑުން ކަނޑައަޅާ އަދި ބެލެހެއްޓޭ ސަޕްލިމެންޓަރީ ފޮރިން އެކްސްޗޭންޖް ރިޒާވް އެސެޓްތަކެވެ. އެސްޑީއާރު އަކީ އިންޓަނޭޝަނަލް މަނިޓަރީ ފަންޑް (އައިއެމްއެފް) އިން، 1969 ވަނަ އަހަރު، މެންބަރު ގައުމުތަކުގެ ރަސްމީ ރިޒާވް އިތުރުކުރުމަށް ތައާރަފްކުރި ބައިނަލްއަގްވާމީ ރިޒާވް އެސެޓެކެވެ. އެއީ އައިއެމްއެފްގެ މެންބަރުންނަށް މި ފައިސާގެ ބޭނުންކުރެވިދާނެ އެވެ. މި ފަންޑުން ޖުމްލަ 943 ބިލިއަން ޑޮލަރު ވަނީ ޖަމާކޮށްފަ އެވެ. އެ ފަންޑުތަކުގެ ސަބަބުން ހާލުގައި ޖެހިފައިވާ ގައުމުތަކަށް އެހީތެރިކަން ފޯރުކޮށްދެ އެވެ. އެންމެ އެސްޑީއާރްއެއްގެ އަގަކީ 20.54 ރުފިޔާ އެވެ.

މި ބައްދަލުވުމުގައި ވާހަކަދައްކަވަމުން މިނިސްޓަރ ވިދާޅުވީ އެސްޑީއާރު ގައުމުތަކަށް ދޭއިރު މުއްސަނދި ގައުމުތަކުގެ ކޮޅަށް ބުރަވާ ކަމަށެވެ. މި އުސޫލު އިސްލާހު ކުރުމަކީ ސިޑްސްގެ މުސްތަގުބަލު ބަދަލުކޮށްދޭނެ ކަމެއްގެ ގޮތުގައި މިނިސްޓަރ ސިފަކުރެއްވި އެވެ. އެއީ މިހާރު ހުރި ދަރަނީގެ ބުރަތައް ބޮޑު ނުކޮށް ލިކުއިޑިޓީ ސަޕޯޓަށް ފުރުސަތު ލިބިގެންދާ ގޮތަށެވެ.

”އަޅުގަނޑު ހުށަހަޅަނީ މުއްސަނދި ގައުމުތަކުން އެމީހުންގެ ބޭނުން ނުކުރާ އެސްޑީއާރުތަކުގެ ބައެއް ސިޑްސްއަށް ބަދަލުކުރާ އިސްލާހުކޮށްފައިވާ ރީއެލޮކޭޝަން ސިސްޓަމެއް. މިކަން ހާސިލް ކުރެވޭނީ އައިއެމްއެފްގެ ރެސިލިއެންސް އެންޑް ސަސްޓެއިނަބިލިޓީ ޓްރަސްޓް ހިމެނޭ ގޮތަށް މިހާރު ހުރި އެކި މެކޭނިޒަމްތަކުގެ ތެރެއިން“

އެސްޑީއާރުތައް ސިޑްސްއަށް އަލުން ދޫކުރުމުން ފޮރިން ރިޒާވް އިތުރުކުރުމާއި، ފިސްކަލް ބަފަރތައް ރަނގަޅުކުރުމާއި، ވަގުތުން ލިކުއިޑިޓީގެ ގޮންޖެހުންތަކަށް ހައްލެއް ހޯދައިދެވޭނެ އެވެ.

ދެވަނަ ކަމަކަށް މިނިސްޓަރ ފާހަގަކުރެއްވީ މޫސުމީ ލަނޑުދަނޑިތަކާ ގުޅިފައިވާ ދަރަނި މާފުކުރުމަށް ޑީއެސްއެސްއެސް އަށް ވަކާލާތު ކުރެވޭނެ ކަމެވެ. ސިޑްސް އިން މޫސުމަށް އަންނަ ބަދަލުތަކާ ކުރިމަތިލާން ޖެހޭ އަމާޒުތައް ހާސިލް ކުރުމުން ބައިލެޓަރަލް އަދި މަލްޓިލޭޓަރަލް ކްރެޑިޓަރުންނަށް ދަރަނީގެ ބައިތައް މާފު ކުރެވޭނެ އެވެ. މިކަމުގެ ސަބަބުން ސިޑްސް އަށް ޒަރޫރީ ތަރައްގީގެ ދާއިރާތަކަށް އަލުން އިންވެސްޓް ކުރެވޭނެ ކަމަށް މިނިސްޓަރ ވިދާޅުވި އެވެ.

މުއްސަނދި ކްރެޑިޓަރުންގެ ދައުރު ވަރަށް މުހިންމުކަން މިނިސްޓަރ ފާހަގަކުރެއްވި އެވެ. މިސާލަކަށް އޭއޭއޭ ރޭޓިން ލިބިފައިވާ މަލްޓިލެޓަރަލް ޑިވެލޮޕްމެންޓް ބޭންކްތަކަށް ސިޑްސް އިން ޑިސްޓްރެސްޑް ޑެޓް އިންސްޓްރޫމެންޓްތައް ގަނެވޭނެ ކަމަށާއި މިފަދަ ގޮތަކަށް ކަންތައް ކުރުމުން ދަރަނީގެ ބުރަތަކުން ކުދި ޖަޒީރާ ގައުމުތަކަށް ލުއި ލިބޭނެ ކަމަށް މިނިސްޓަރ ވިދާޅުވި އެވެ.

މިގޮތަށް ކަންތައް ކުރުމުން ދަރަނި ހިދުމަތް ދިނުމުން ލިބޭ ރައްކާކުރެވޭ ފައިސާ، ސިއްހީ ފަރުވާ، ތައުލީމު، ނުވަތަ ދެމެހެއްޓެނިވި ފަތުރުވެރިކަން ފަދަ އެހެން މުހިންމު ދާއިރާތަކަށް އަލުން އިންވެސްޓް ކުރެވޭނެ ކަމަށް މިނިސްޓަރ ވަކާލާތު ކުރެއްވި އެވެ.

ކޮޕް29 މިނިސްޓަރ ޠާރިޤު އިބްރާހީމް މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ