އަންނަ އަހަރުގެ ޖެނުއަރީގެ ނިޔަލަށް ހުޅުމާލެ ފޭސް 3 ހިއްކާ ނިންމާ، ގޯތި ލިބިފައިވާ މީހުންނަށް ބިން ހަވާލު ކުރުމުގެ މަސައްކަތް ކުރައްވަމުން ގެންދަވާކަމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ގެ އެމްޑީ އިބްރާހިމް ފަޒުލް ރަޝީދު ވިދާޅުވެއްޖެ އެވެ.
ފަޒުލް މިހެން ވިދާޅުވީ އެޗްޑީސީން ކުރިއަށްގެންދިއުމަށް ހަމަޖެހިފައިވާ, ސޯޝަލް ހައުސިން އާއި ލަގްޒަރީ ވިލާތައް ހިމެނޭހެން 15 މަޝްރޫއެއް އިފްތިތާހު ކުރުމަށް ރޭ ހުޅުމާލެ ސެންޓްރަލް ޕާކުގައި ކުރިއަށް ގެންދިޔަ ރަސްމިއްޔާތުގައި ވާހަކަ ދައްކަވަމުންނެވެ.
ފަޒުލް ވިދާޅުވީ ކުރީ ސަރުކާރުން ބިންވެރިޔާ ސްކީމްގެ ނަމުގައި ކަނޑުންނާއި ފަޅުން ގޯތިތަކެއް ދީފައިވާ ކަމަށާއި އޭގެ ތެރެއިން އެއްބަޔަކީ ހުޅުމާލެ ފޭސް 3 އިން ދީފައި ހުރި ބިންތަކެއް ކަމަށެވެ. އަދި ފޭސް 3 ހިއްކުން މިއަދާ ހަމައަށް މަޑުޖެހިފައިވާކަން އެޗްޑީސީގެ އެމްޑީގެ ހައިސިއްޔަތުން ގަބޫލު ކުރައްވާ ކަމަށް ފަޒުލް ވިދާޅުވި އެވެ.
އޭގެ ގޮންޖެހުންތަކެއް އެބަ ހުރި. އެހެންނަމަވެސް އެ ގޮންޖެހުންތަކާ އެކީގައި އަޅުގަނޑުމެން މިއަދާ ހަމައަށް މި ކުރަމުން އައި މަސައްކަތަކީ އެޗްޑީސީ އޭގެ ޒާތުގައި އެއް ހިސާބެއްގައި ހިފެހެއްޓުމަށް ކުރެވުނު މަސައްކަތް.
ފަޒުލް ވިދާޅުވީ ބިންވެރިޔާ ސްކީމްގެ ދަށުން ހުޅުމާލެ ފޭސް 3 އިން ގޯތި ލިބުނު ރައްޔިތުންނަށް ދޭން ބޭނުންވާ ޔަގީންކަމަކީ ދާދި އަވަހަށް ފޭސް 3 ހިއްކުމުގެ މަސައްކަތް ފަށާ އަންނަ ޖެނުއަރީގެ ނިޔަލަށް ގޯތިތައް އޭގެ ހައްގުވެރިންނަށް ހަވާލު ކުރުމަށް ކުރަން ޖެހޭ މަސައްކަތް ކުރަމުންދާ ކަމުގެ ޔަގީންކަން ކަމަށެވެ.
ހުޅުމާލޭ ތިންވަނަ ފިޔަވަހި ހިއްކުމުގެ މަޝްރޫއަކީ މާލޭ ސަރަހައްދުގައި ދިރިއުޅޭ ފަރާތްތަކަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދައިދިނުމަށް ސަރުކާރުން ކުރިއަށްގެންދާ މަޝްރޫއެކެވެ. އެ މަޝްރޫއުގެ މަސައްކަތް އަވަހަށް ނިންމައި، ބޯހިޔާވަހިކަމުގެ ފުރުސަތު ވީހާވެސް ގިނަ ރައްޔިތުންނަށް ހޯދައިދިނުމަށް އެޗްޑީސީ އިން އަންނަނީ މަސައްކަތް ކުރަމުން ނެވެ.
ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ހައުސިން ޑިވެލޮޕްމެންޓް ކޯޕަރޭޝަންގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ހުޅުމާލެ ބިންވެރިޔާ ސްކީމް
