އަންނަ އަހަރަށް ލަފާކުރާ ދައުލަތުގެ ބަޖެޓަށް ރައްޔިތުންގެ މަޖިލީހުގައި ބަހުސް ކުރުން މިރޭ 11 ޖެހުމާ ހަމައަށް ކުރިއަށް ގެންދަން މިއަދު ނިންމައިފި އެވެ.

ސަރުކާރުން ހުށަހަޅާފައިވާ 56.6 ބިލިއަން ރުފިޔާގެ ބަޖެޓުގެ ބަހުސް މަޖިލީހުގައި ފެށިފައިވަނީ އިއްޔެ އެވެ. ނަމަވެސް، ބަޖެޓު ފޮތް ލިބުމުގައި ލަސްތަކެއް ވުމުގެ ސަބަބުން މެންބަރުންނަށް ފޮތަށް އަހުލުވެރިވުމަށް ވަގުތު ދިނުމަށްޓަކައި އިއްޔެގެ ބަހުސް ކުރިއަށް ގެންގޮސްފައިވަނީ ދޮޅު ގަޑިއިރު އެކަނި އެވެ.

މިއަދުގެ މަޖިލީހުގެ ޖަލްސާގައި، ބަހުސް ކުރިއަށް ގެންދިއުމުގެ ކުރިން، ވާހަކަދައްކަވަން ބޭނުންފުޅުވާ ހުރިހާ މެންބަރުންނަށް ފުރުސަތު ދިނުމަށްޓަކައި މިރޭ 11 ޖަހަންދެން ވަގުތު އިތުރުކުރުމަށް ވޯޓަށް އަހާފައިވެ އެވެ. މި ހުށަހެޅުމަށް ވޯޓުގައި ބައިވެރިވި 52 މެންބަރުން ވަނީ ތާއީދު ކުރައްވާފައެވެ. އަދި އެއްވެސް މެންބަރަކު މިކަމާ ދެކޮޅަކަށް ވޯޓެއް ނުދެއްވަ އެވެ.

މި ނިންމުމާއެކު، ބަޖެޓުގެ ބަހުސް މިރޭ 11 ޖަހަންދެން ކުރިއަށް ގެންދެވޭނެ އެވެ.

ބަޖެޓް ބަހުސްއަށްފަހު، ބަޖެޓް ދިރާސާކުރުމަށް ދެން ފޮނުވޭނީ ކޮމެޓީއަށެވެ. އަދި ކޮމެޓީން ބަޖެޓަށް ގެންނަ އިސްލާހުތަކާއެކު އަނެއްކާވެސް މުޅި މަޖިލީހުގައި ބަޖެޓް ބަހުސް ކުރިއަށްގެންދާނެ އެވެ. ބަޖެޓް ބަހުސްގެ މި މަރުހަލާގައި ކޮންމެ މެމްބަރަކަށް ލިބިވަޑައިގަންނަވާނީ 15 މިނެޓް އެވެ.

ރައްޔިތުންގެ މަޖިލިސް ދައުލަތުގެ ބަޖެޓް