މިދިޔަ އަހަރާ އަޅާބަލާއިރު ދައުލަތުގެ އާމްދަނީއަށް ކުރިއެރުމެއް ލިބި އާމްދަނީ 1.89 ބިލިއަން ޑޮލަރަށް އަރައިފި އެވެ.

ފިނޭންސް މިނިސްޓްރީން އެންމެ ފަހުން ޝާއިއުކުރި ހަފްތާ ބަންދުގެ ރިޕޯޓުގައިވާ ގޮތުން، 2024 ވަނަ އަހަރުގެ އޮކްޓޯބަރު 31 ވަނަ ދުވަހުގެ ނިޔަލަށް ދައުލަތުގެ އާމްދަނީ 1.89 ބިލިއަން ޑޮލަރަށް އަރާފައިވެ އެވެ. މިއީ 2023 ވަނަ އަހަރުގެ މި މުއްދަތުގައި ލިބުނު 1.85 ބިލިއަން ޑޮލަރާ އަޅާބަލާއިރު 1.5 އިންސައްތައިގެ އިތުރުވުމެކެވެ.

ރިޕޯޓުގައި ދައްކާ ގޮތުގައި މިއަހަރުގެ ދައުލަތުގެ އާމްދަނީގެ ގޮތުގައި ލިބުނު 1.89 ބިލިއަން ޑޮލަރުގެ ތެރޭގައި ހިމެނެނީ، ޓެކްސް އާމްދަނީގެ ގޮތުގައި 1.45 ބިލިއަން ޑޮލަރު، ޓެކްސް ނޫން އާމްދަނީގެ ގޮތުގައި 402 މިލިއަން ޑޮލަރު އަދި މާލީ އެހީގެ ގޮތުގައި 36.6 މިލިއަން ޑޮލަރެވެ.

ޓެކްސް މެދުވެރިކޮށް ލިބޭ އާމްދަނީގެ ތެރޭގައި މުހިންމު ގޮތެއްގައި ހިމެނެނީ އިމްޕޯޓް ޑިއުޓީ، ބިޒްނަސް އެންޑް ޕްރޮފިޓް ޓެކްސް (ބީޕީޓީ) އަދި ގޫޑްސް އެންޑް ސާވިސަސް ޓެކްސް (ޖީއެސްޓީ) އެވެ. މިގޮތުން އިމްޕޯޓް ޑިއުޓީގެ ގޮތުގައި 169 މިލިއަން ޑޮލަރު، ބީޕީޓީގެ ގޮތުގައި 370 މިލިއަން ޑޮލަރު، އަދި ޖީއެސްޓީގެ ގޮތުގައި 772 މިލިއަން ޑޮލަރު ލިބިފައިވެ އެވެ. މީގެ އިތުރުން ގްރީން ޓެކްސްގެ ގޮތުގައި 57.1 މިލިއަން ޑޮލަރު އަދި އެއާޕޯޓް ސާވިސަސް ޗާޖް އެންޑް ޑިޕާޗާ ޓެކްސްގެ ގޮތުގައި 60.3 މިލިއަން ޑޮލަރު ސަރުކާރަށް ލިބިފައިވެ އެވެ.

މިދިޔަ ދިހަ މަސް ދުވަހުގެ ތެރޭގައި ދައުލަތުގެ ޚަރަދު 2.67 ބިލިއަން ޑޮލަރަށް އަރާފައިވާކަން ތަފާސް ހިސާބުތަކުން ދައްކައެވެ. މީގެ ތެރޭގައި ރިކަރެންޓް ޚަރަދުގެ ގޮތުގައި 1.81 ބިލިއަން ޑޮލަރު އަދި ކެޕިޓަލް ޚަރަދުގެ ގޮތުގައި 720 މިލިއަން ޑޮލަރު ހިމެނެއެވެ. ރިކަރެންޓް ޚަރަދުގެ ތެރެއިން މުސާރައާއި އުޖޫރައިގެ ގޮތުގައި 726 މިލިއަން ޑޮލަރު ހޭދަކޮށްފައިވާއިރު، އިދާރީ ޚަރަދުތަކަށް 1.07 ބިލިއަން ޑޮލަރު ޚަރަދުކޮށްފައިވެ އެވެ.

މި ރިޕޯޓުން ދައްކާގޮތުގައި، ދައުލަތުގެ އާމްދަނީ އިތުރުވެފައިވަނީ ޓެކްސް އާމްދަނީ އިތުރުވުމާއި ގުޅިގެންނެވެ. ނަމަވެސް، ދައުލަތުގެ ޚަރަދުތައްވެސް އިތުރުވެފައިވާކަން ފާހަގަކުރެވެއެވެ. މިކަމުން ދައްކައިދެނީ، އިޤްތިޞާދީ ޙަރަކާތްތައް އިތުރުވެފައިވާކަމާއި، އެހެންނަމަވެސް ދައުލަތުގެ ޚަރަދުތައް ބެލެހެއްޓުމަށް އިތުރު ސަމާލުކަމެއް ދޭންޖެހިފައިވާކަމެވެ.

މިނިސްޓްރީ އޮފް ފިނޭންސް