ދައުލަތުގެ ރަސްމީ ރިޒާވް އެސެޓްތައް 614.6 މިލިއަން ޑޮލަރަށް އިތުރުވެއްޖެ އެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިރޭ ހާމަކުރި ތަފާސްހިސާބުތަކުން ދައްކާގޮތުގައި މިއީ ސެޕްޓެންބަރު މަހުގެ ނިޔަލަށް ރެކޯޑުކުރެވިފައިވާ 371.2 މިލިއަން ޑޮލަރާ އަޅާބަލާއިރު 65.5 އިންސައްތައިގެ އިތުރުވުމެކެވެ.
އެމްއެމްއޭއިން ބުނާގޮތުގައި މި އިތުރުވުމުގެ މައިގަނޑު ސަބަބަކީ ރިޒާވް ބޭންކް އޮފް އިންޑިއާ (އާރްބީއައި) އިން ކަރަންސީ ސްވޮޕްގެ ގޮތުގައި 400 މިލިއަން ޑޮލަރު ލިބިފައިވުމެވެ. މި ފައިސާގެ ތެރެއިން 120 މިލިއަން ޑޮލަރު ރާއްޖޭގެ ބޭންކުތަކުގައި ވަނީ އިންވެސްޓްކޮށްފަ އެވެ.
އެމްއެމްއޭއިން އިތުރަށް ހާމަކުރިގޮތުގައި މި ނިންމުމުގެ ސަބަބުން އެމްއެމްއޭގެ ރިޓާން އޮޕްޓިމައިޒްކުރުމުގެ މަގުސަދު ހާސިލުވުމުގެ އިތުރުން މާލީ ދާއިރާގެ ހަމަޖެހުމާއި ކުރިއެރުމަށް އެހީތެރިވެދީ، މުޅި އިގުތިސާދަށް އޭގެ ފައިދާ ކުރާނެ އެވެ.
މި އިތުރުވުމާއެކު އޮކްޓޯބަރު މަހުގެ ނިޔަލަށް ދައުލަތުގެ ރަސްމީ ރިޒާވް އެސެޓްތައް 614.6 މިލިއަން ޑޮލަރަށް އަރާފައިވާކަން ފާހަގަކުރެވެ އެވެ. މިއީ ރާއްޖޭގެ އިގުތިސާދީ ހާލަތު ރަނގަޅުވަމުން އަންނަކަމުގެ އިޝާރާތެއްކަމަށް އިގުތިސާދީ މާހިރުން ދެކެ އެވެ.
