ކާރެއްގެ ތެރޭ މީހަކު ރަހީނުކުރި މައްސަލާގައި އިތުރު ހަތަރު މީހަކު ހައްޔަރުކޮށްފި އެވެ.
މި މައްސަލާގައި މިހާތަނަށް ޖުމްލަ ފަސް މީހަކު ވަނީ ހައްޔަރުކޮށްފަ އެވެ.
ފުލުހުން މަޢުލޫމާތު ދެއްވާފައިވާ ގޮތުގައި، މި ހާދިސާ ހިނގާފައިވަނީ އިއްޔެގެ ވަގުތެއްގައި ހުޅުމާލޭގަ އެވެ. ކާރެއްގެ ތެރޭގައި ދިވެހި ފިރިހެނަކު ރަހީނުކޮށް، އޭނާއަށް އަނިޔާކޮށް ބިރުދައްކާފައިވާ ކަމަށް ފުލުހުން ބުނެ އެވެ. އަދި އެ މީހާގެ އާއިލާގެ މީހުންނަށް ގުޅައިގެން ފައިސާއަށް ޑިމާންޑުކޮށްފައިވާ ކަމަށްވެސް ފުލުހުން ވިދާޅުވެ އެވެ.
މި މައްސަލާގައި ފުރަތަމަ ހައްޔަރުކުރެވުނީ 37 އަހަރުގެ ދިވެހި ފިރިހެނެކެވެ. އޭގެ ފަހުން، މިރޭ ފުލުހުން މީޑިއާތަކަށް ފޮނުވި މެސެޖެއްގައި ބުނެފައިވަނީ އެ ކުށް ހިންގި ތަނުން އިތުރު ހަތަރު މީހަކު ވެސް ހައްޔަރުކޮށްފައިވާ ކަމަށެވެ.
މި މައްސަލާގައި ހައްޔަރުކޮށްފައިވާ ފަސް މީހުންނަކީ:
- ތޮލާލު މޫސާ (37 އަހަރު، މާލެ)
- ހުސާމް އިބްރާހިމް (34 އަހަރު، ރަތްބަގީޗާގެ/ހދ.ކުމުންދޫ)
- އާދަމް ޝަރީފް (36 އަހަރު، ރަތްބަގީޗާގެ/ހދ.ކުމުންދޫ)
- ހުސެއިން ހައިކަލް ނިޔާޒް (23 އަހަރު، ގ. ކަޅަގާރިމާގެ)
- އަހުމަދު ރިޝްފާން (26 އަހަރު، ހުޅުމާލެ)
މި ފަސް މީހުންގެ ބަންދާމެދު ގޮތެއް ނިންމުމަށް ހުޅުމާލެ މެޖިސްޓްރޭޓް ކޯޓަށް ހާޒިރުކުރުމުން، އެ އެންމެން ވެސް ހަތް ދުވަހުގެ މުއްދަތަކަށް ބަންދުކުރުމަށް ކޯޓުން ވަނީ އަމުރުކޮށްފަ އެވެ.
މި މައްސަލައިގެ ތަޙްޤީޤު ފުލުހުން ދަނީ ކުރިއަށް ގެންދަމުންނެވެ.
