އުރީދޫ މޯލްޑިވްސްއިން އިންތިޒާމުކޮށްގެން ކޮންމެ އަހަރަކު ބާއްވަމުންދާ ފަންރަންގައި ރަޖިސްޓާރ ކުރުމައް ދެން ބާކީ 4 ދުވަހެވެ.
މި ހަރަކާތް އޮންނާނީ އަންނަ ޑިސެމްބަރު މަހުގެ 20 ވަނަ ދުވަހު އެވެ.
އުރީދޫއިން ބުނެފައި ވަނީ މިހާރު މި ހަރަކާތުގައި ބައިވެރިވުމަށް ރަޖިސްޓްރޭޝަން ބާކީ 4 ދުވަހަށް ވެފައިވާ ކަމަށެވެ. އަދި ބައިވެރިވާން ބޭނުންވާ ފަރާތްތަކަށް އުރީދޫގެ ވެބްސައިޓް މެދުވެރިކޮށް ރަޖިސްޓަރ ކުރެވޭނެ ކަމަށެވެ.
އުރީދޫ ފަން ރަން އަކީ އާންމުންގެ މެދުގައި ވަރަށް މަޤުބޫލު ހަރަކާތެއްކަން ފާހަގަކޮށްފައިވެ އެވެ. އެގޮތުން މިދިޔަ އަހަރު ހުޅުމާލޭގައި ބޭއްވުނު ފަން ރަންގައި 5000 އަށްވުރެ ގިނަ މީހުން ބައިވެރިވިކަމަށް އުރީދޫއިން ބުނެފައިވެ އެވެ.
އުރީދޫއިން އިތުރަށް ބުނެފައިވަނީ މިއީ އާއިލާއާއެކު މަޖާކޮށްލުމަށް ލިބޭ ރަނގަޅު ފުރުސަތެއް ކަމަށެވެ. އެހެންކަމުން، ބައިވެރިންގެ ދުވުމުގެ ވަގުތު ބަލާ ރެކޯޑުކުރުމަށް ހަމަޖެހިފައިނުވާ ކަމަށްވެސް ބުނެފައިވެއެވެ.
މި ހަރަކާތުގައި ބައިވެރިވާ ފަރާތްތަކަށް 5 ކިލޯމީޓަރުގެ ދުރުމިނަށް ދުވަން ޖެހޭނެ އެވެ. ކޮންމެ ކިލޯމީޓަރެއްގައި ފޯމް، ފެން، އަދި އެހެނިހެން ހުރަސްތަކާ ކުރިމަތިލާންޖެހޭނެ ކަމަށް އުރީދޫއިން މަޢުލޫމާތު ދީފައިވެ އެވެ.
