އިޒްރޭލް ޕާސްޕޯޓުގައި ރާއްޖެއަށް ނާދެވޭ ގޮތަށް ހެދުމަށް އިމިގްރޭޝަން ގާނޫނަށް ހުށަހެޅި އިސްލާހުގެ މަސައްކަތް އަންނަ އަހަރުގެ ފެބްރުއަރީ މަހަށް ނިންމުމަށް ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީން ނިންމައިފި އެވެ.
އިމިގްރޭޝަންގެ ޤާނޫނަށް އިސްލާހު ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމެވެ.
މި އިސްލާހުގެ މަސައްކަތް ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީން މިއަދު ކުރިއަށްގެންދިޔައިރު އެ ކޮމިޓީ ބައްދަލުވުމުގައި ފާސްކޮށްފައިވަނީ އެ އިސްލާހުގެ މަސައްކަތް 2025 ވަނަ އަހަރުގެ ފެބްރުއަރީއަށް ނިންމުމަށެވެ.
މި ބިލިގެ މަސައްކަތް ކުރިއަށްގެންދާއިރު ރާއްޖޭގައި އުފެދައިފައިވާ ސިޔާސީ ޕާޓީތަކާއި، ޓޫރިޒަމް ދާއިރާގައި މަސައްކަތްކުރާ މަޓީ އަދި އެހެންވެސް އެންޖީއޯތަކާ ބައްދަލުކުރުމަށް މާފަންނު އުތުރު ދާއިރާގެ މެންބަރު މުހައްމަދު ނާޒިމް ހުށަހެޅުއްވި އެވެ. އަދި ކޮމިޓީގެ މުގައްރިރު އޭދަފުށި ދާއިރާގެ މެންބަރު އަހުމަދު ސަލީމް ވިދާޅުވީ، އިޒްރޭލު ޕާސްޕޯޓް މަނާ ކުރުމުގެ އިސްލާހުގެ މަސައްކަތް ކުރިއަށް ގެންދާއިރު އެ ފަރާތްތައް އަދި އޭގެއިތުރުންވެސް ކަމާގުޅޭ ފަރާތްތަކާއި މަޝްވަރާ ކޮށްގެން ބިލުގެ މަސައްކަތް ކުރިއަށް ގެންދަވާނެ ކަމަށެވެ.
މީކާއިލް އިސްލާހު ހުށަހަޅާފައިވަނީ އިމިގްރޭޝަން ޤާނޫނުގެ 8 ވަނަ މާއްދާ ”ރާއްޖެ އެތެރެވުމުގެ ހުއްދަނެތް މީހުން“ މި މާއްދާއަށެވެ. މީކާއިލް ހުށަހަޅާފައިވަނީ އިޒްރޭލުގެ ޕާސްޕޯޓް ގެންގުޅޭ މީހުން އަދި އިޒްރޭލުގެ ޕާސްޕޯޓުގެ އިތުރަށް އެހެން ގައުމެއްގެ ޕާސްޕޯޓް ގެންގުޅޭ މީހުންވެސް ރާއްޖެ އެތެރެވުން މަނާކުރުމަށެވެ.
