ދިވެހިރާއްޖެއަށް ވޭޕާއި، ވޭޕު ކުރުމަށް ބޭނުންކުރާ ތަކެތި އެތެރެކޮށް، ބޭނުންކޮށް އަދި ވިޔަފާރި ކުރުން މަނާކުރުމަށް ސަރުކާރުގެ ފަރާތުން ހުށަހަޅާފައިވާ އިސްލާހު ރައްޔިތުންގެ މަޖިލީހުން ފާސްކޮށްފި އެވެ.
މި އިސްލާހު ހުށަހެޅުއްވީ ސަރުކާރުގެ ފަރާތުން ހެންވޭރު އުތުރު ދާއިރާގެ މެންބަރު އަހްމަދު އައިފާނެވެ. މި އިސްލާހު މަޖިލީހުން ފާސްކޮށްފައިވަނީ ވޯޓުގައި ބައިވެރިވި 54 މެންބަރުންގެ ވޯޓުންނެވެ. މި އިސްލާހަށް ވަކިގޮތަކަށް ވޯޓު ނުދެއްވާ 8 މެންބަރުން ތިއްބެވި އެވެ.
މި އިސްލާހުގެ މައިގަނޑު މަޤްޞަދަކީ އިލެކްޓްރޯނިކް ސިނގިރޭޓާއި ވޭޕް ކުރުމަށް ބޭނުންކުރާ އާލާތްތަކާއި، އެ އެއްޗެހީގެ ބައިތައް ރާއްޖެއަށް އެތެރެކުރުމާއި، ވިއްކުމާއި، ހިލޭ ބެހުމާއި އަދި ބޭނުންކުރުން މަނާކުރުމެވެ. މީގެ އިތުރުން، 21 އަހަރުން ދަށުގެ މީހުންނަށް ދުންފަތުގެ އެއްވެސް ބާވަތެއް ވިއްކުންވެސް މި އިސްލާހުގައި މަނާކޮށްފައިވެ އެވެ.
މި އިސްލާހުގެ ދަށުން ޤާނޫނާ ޚިލާފުވާ ފަރާތްތަކަށް ބޮޑެތި ޖޫރިމަނާތަކެއް ކަނޑައަޅާފައިވެ އެވެ. އެގޮތުން:
- ވޭޕް އެތެރެކުރާ ފަރާތްތައް 50,000 ރުފިޔާއިން ޖޫރިމަނާކުރެވޭނެ. އަދި އެތެރެކުރާ ކޮންމެ ވޭޕަކަށް އިތުރު 10,000 ރުފިޔާ އިތުރުކުރެވޭނެ.
- ވޭޕް ވިއްކާ ފަރާތްތައް 20,000 ރުފިޔާއިން ޖޫރިމަނާކުރެވޭނެ. އަދި ވިއްކާ ކޮންމެ ވޭޕަކަށް 10,000 ރުފިޔާ އިތުރުކުރެވޭނެ.
- ވޭޕް ހިލޭ ދޭ ފަރާތްތައް 10,000 ރުފިޔާއިން ޖޫރިމަނާކުރެވޭނެ.
- ވޭޕް ބޭނުންކުރާ ފަރާތްތައް 5,000 ރުފިޔާއިން ޖޫރިމަނާކުރެވޭނެ.
މި އިސްލާހު ފާސްވުމުން، ދުންފަތުގެ ބޭނުންކުރުން ހުއްޓުވުމަށް ސަރުކާރުން ކުރަމުންދާ މަސައްކަތަށް އިތުރު ބާރެއް ލިބިގެންދާނެ އެވެ.
ރައްޔިތުންގެ މަޖިލިސް ދުންފަތް ކޮންޓްރޯލްކުރުމާއި، ވޭޕް މަނާކުރުން
