މޫސުމަށް އަންނަ ބަދަލުތަކާ ގުޅިގެން ކާރިސާ މެނޭޖްކުރުމުގެ މަސައްކަތްތަކާއި ކާބޯތަކެތީގެ ރައްކާތެރިކަމުގެ ކަންބޮޑުވުންތައް އިތުރުކުރުމުގެ މަގުސަދުގައި 21 މިލިއަން ޑޮލަރުގެ ފައިނޭންސިން ޕެކޭޖެއް އޭޝިއަން ޑިވެލޮޕްމަންޓް ބޭންކުން ރާއްޖެއަށް ދީފި އެވެ.
ބޭންކުން އިއުލާން ކުރި ގޮތުގައި ޕެކޭޖުގެ ތެރެއިން ހަތަރު މިލިއަން ޑޮލަރު ލޯނެއްގެ ގޮތުގައި ދޫކުރާއިރު، 17.95 މިލިއަން ޑޮލަރަކީ އެ ބޭންކުން ދޭ ހިލޭ އެހީއެކެވެ.
އޭޑީބީން ބުނީ ފޯރުކޮށްދޭ މާލީ އެހީގެ ސަބަބުން ކާރިސާތަކުން ރައްކާތެރިވުމާއި މެނޭޖްކުރުމުގެ މަސައްކަތްތައް ހަރުދަނާކުރުމާއި ފުޑް ސެކިއުރިޓީ ހޯދުމަށް ރާއްޖެއަށް އެހީތެރިވެދެވޭނެ ކަމަށެވެ. މީގެ ތެރޭގައި މޯލްޑިވްސް މީޓިއޮރޮލޮޖިކަލް ސާވިސް (މެޓް އޮފީސް) ގައި ހުރި އިކުއިޕްމަންޓްތައް އަޕްގްރޭޑްކޮށް ޒަމާނީ ކުރުމާއި، މާލެ އަދި އައްޑޫ ސިޓީގައި އަރލީ ވާނިން ސިސްޓަމެއް (ދުރާލާ މޫސުމީ ސަމާލު ނެރެދޭ ސިސްޓަމެއް) ގާއިމްކުރުމާއި، ކުޅުދުއްފުށީ ސިޓީގައި ސްޓޯމް ވޯޓަރ ޑްރެއިނޭޖް ސިސްޓަމް ގާއިމްކުރުން ހިމެނެ އެވެ.
މީގެ އިތުރުން ކްލައިމެޓް ސްމާޓް އާބަން ޕަރމިންގ ސާމާނު ރާއްޖެއަށް ތައާރަފްކޮށް، ހއ. އަދި އައްޑޫ ސިޓީގެ ރައްޔިތުން އެ ސާމާނަށް އަހުލުވެރިކުރުވުމުގެ މަސައްކަތްވެސް މި މާލީ އެހީގެ ދަށުން ކުރެވޭނެ އެވެ. މީގެ އިތުރުން އޭޑީބީން ވަނީ ކަމާބެހޭ ދިރާސާތައް ކުރުމަށް ހދ. ހަނިމާދޫގައި ހުންނަ އެގްރިކަލްޗަރ ސެންޓަރުގައި މަލްޓިޕާޕަސް ފެސިލިޓީއެއް ތަރައްގީކުރުމުގެ މަސައްކަތް ފާހަގަކޮށްފަ އެވެ.
އޭޑީބީ އިން 21 މިލިއަން ޑޮލަރުގެ ފައިނޭންސިން ޕެކޭޖެއް ފޯރުކޮށްދީފައިވާއިރު، ރާއްޖޭގެ އިގްތިސާދީ އަދި އިންފްރާސްޓްރަކްޗަރަލް ޑިވެލޮޕްމަންޓުގައި އެ ބޭންކުން ބޮޑު ދައުރެއް އަދާކުރެ އެވެ.
