މޯލްޑިވްސް އިންޓަނޭޝަނަލް ފައިނޭންޝަލް ސެންޓަރު ތަރައްޤީ ކުރުމަށް އެހީތެރިވެދީ، ރަޖިސްޓްރީގެ އޮޕަރޭޝަންތައް އިތުރަށް ފުރިހަމަ ކުރުމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑާއި އަބޫދާބީ ގްލޯބަލް މާކެޓް ރެޖިސްޓްރޭޝަން އޮތޯރިޓީއާ ދެމެދު އެއްބަސްވުމެއްގައި މިއަދު ސޮއިކޮށްފި އެވެ.
މި އެއްބަސްވުމުގައި ސޮއިކުރެއްވީ އިކޮނޮމިކް މިނިސްޓަރ މުޙައްމަދު ސައީދާއި އޭޑީޖީއެމް ރެޖިސްޓްރޭޝަން އޮތޯރިޓީގެ ސީއީއޯ ހަމާދު ސަޔާތު އަލް މަޒްރޫއީ އެވެ. މި އެއްބަސްވުމުގެ ދަށުން ދެ ފަރާތުން އެއްބާރުލުން ދޭނެ ފަސް މައިގަނޑު ދާއިރާއެއް ކަނޑައަޅާފައިވެ އެވެ.
މިނިސްޓަރ ސައީދު ވިދާޅުވީ މި އެއްބާރުލުމަކީ ސަރަހައްދީ މާލީ މަރުކަޒެއްގެ ގޮތުގައި ރާއްޖެ ޤާއިމުކުރުމަށް އެޅޭ ވަރަށް މުހިންމު ފިޔަވަޅެއް ކަމަށެވެ. އަދި އޭޑީޖީއެމްގެ ރެގިއުލޭޓަރީ އަދި އޮޕަރޭޝަނަލް ތަޖުރިބާގެ މައްޗަށް ބިނާކޮށް، ރައީސް ޑރ. މުޙައްމަދު މުޢިއްޒުގެ އިޤްތިޞާދީ ސިންދަފާތުކުރުމުގެ ތަސައްވަރާ އެއްގޮތްވާ އަދި ދުނިޔޭގެ އިންވެސްޓްމަންޓް ޝައުޤުވެރިވާނެ ބައިނަލްއަޤްވާމީ މާލީ މަރުކަޒެއް އުފެއްދުމަށް މަސައްކަތްކުރާނެ ކަމަށް ވިދާޅުވި އެވެ.
މި އެއްބަސްވުމުގެ ދަށުން އެއްބާރުލުން ދޭނެ ފަސް ދާއިރާގެ ތެރޭގައި ރަޖިސްޓްރީ ހިންގުމަށް ޤާނޫނީ އަދި އިޖުރާއަތުގެ އޮނިގަނޑުތައް އެކުލަވާލުމާއި، މުވައްޒަފުން ތަމްރީނުކުރުމާއި ބަދަލުކުރުން ހިމެނޭ ގޮތަށް ކެޕޭސިޓީ ބިލްޑިންގ ޕްރޮގްރާމްތައް ހިންގުން ހިމެނެ އެވެ. މީގެ އިތުރުން، ހިއްސާކުރެވޭ ބެސްޓް ޕްރެކްޓިސްތަކުގެ ތެރެއިން އޮޕަރޭޝަނަލް ސްޓޭންޑަރޑްސް އިތުރުކުރުމާއި، ބައިނަލްއަޤްވާމީ މިންގަނޑުތަކާ ބެހޭގޮތުން އިލްމު ބަދަލުކުރުމާއި، ރަޖިސްޓްރީގެ ވަސީލަތްތައް ރަނގަޅު ކުރުމަށް ފަންނީ އެހީތެރިކަން ފޯރުކޮށްދިނުން ހިމެނެ އެވެ.
މި އެއްބަސްވުމުގެ ތެރެއިން ދެފަރާތުންވެސް ގަވާއިދުން ޢިލްމު ހިއްސާކުރުމާއި، ޖޮއިންޓް ޓްރައިނިންގް ޕްރޮގްރާމްތައް ހިންގުމާއި އަދި ދެފަރާތުގެ އޮޕަރޭޝަނަލް ސަޕޯޓް ދިނުމަށް ވަނީ ހަމަޖެހިފަ އެވެ. މިނިސްޓްރީން ބުނިގޮތުގައި މި ޕާޓްނަރޝިޕްގެ މަޤްޞަދަކީ މޯލްޑިވްސް ފްޕެންޝަލް ސެކްޓަރގެ ތަރައްޤީ އަވަސްކޮށްދިނުމާއި އެކު ދެ ފަރާތުގެ މެދުގައި އިޤްތިޞާދީ ގުޅުންތައް ވަރުގަދަ ކުރުމެވެ.
މި އެއްބަސްވުމުގެ ސަބަބުން ރާއްޖޭގެ މާލީ ދާއިރާ އިތުރަށް ތަރައްޤީވެ، ބައިނަލްއަޤްވާމީ އިންވެސްޓަރުންގެ ޝައުޤުވެރިކަން އިތުރުވެގެންދާނެ ކަމަށް ބެލެވެ އެވެ.
ރާއްޖެ - ޔޫއޭއީ އިކޮނޮމިކް މިނިސްޓަރު މުހައްމަދު ސައީދު މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް
