އައިޖީއެމްއެޗުގައި މަސައްކަތްކުރަމުންދިޔަ ފިލިޕީންސްގެ ނަރުހެއް ކަމަށްވާ މޭރީ ގްރޭސް މަރާލި މައްސަލައިގައި ދައުވާ އުފުލައި ޝަރީއަތް ނިމެންދެން ބަންދުކޮށްފައި ހުރި ހަލީމަތު ލަމްހާ ބަންދުން ދޫކޮށްލައިފި އެވެ.
މި މައްސަލައިގައި ލަމްހާ ޝަރީއަތް ނިމެންދެން ބަންދުކޮށްފައި ހުރިއިރު، މިމައްސަލައިގެ އަޑުއެހުމެއް މިއަދު ކްރިމިނަލް ކޯޓުގައި ކުރިއަށް ގެންގޮސްފައިވެ އެވެ. އެގޮތުން ލަމްހާގެ ބަންދާ މެދު ގޮތެއް ނިންމުމަށް އެދި ހުށަހެޅި ހުށަހެޅުމާއި ގުޅޭގޮތުން މައްސަލަ ބައްލަވާ ގާޒީ ނިންމެވީ ޝަރުތުތަކަކާއެކު ލަމްހާ ބަންދުން ދޫކޮށްލުމަށެވެ. ޝަރުތުތަކަކާއެކު ލަމްހާ ބަންދުން ދޫކޮށްލާފައިވަނީ ތިން މަސްދުވަހުގެ މުއްދަތަށެވެ.
މީގެކުރިން މިދިޔަ އަހަރު ނޮވެމްބަރު މަހުގެ ތެރޭގައިވެސް ލަމްހާ ބަންދު ދޫކޮށްލާފައިވެ އެވެ. އެހެންނަމަވެސް އަލުން ބަންދު ކުރުމަށް ހައިކޯޓުން ޑިސެމްބަރުގައި ނިންމުމުން އޭގެފަހުން އޭނާ ހުރީ ބަންދުގަ އެވެ.
ފިލިޕިންސަށް ނިސްބަތްވާ މޭރީ މަރާލާފައިވަނީ 19 އޮކްޓޫބަރު 2021 ގައެވެ. މޭރީ މަރާލި މައްސަލައިގައި ދައުވާ އުފުލާފައިވަނީ މޭރީގެ ފިރިމީހާ މާވިން އެސްވައި ވާގަސް އާއި އޭނާގެ ދިވެހި ލޯބިވެރިޔާ ހަލީމަތު ލަމްހާ އެވެ. އެގޮތުން މާވިން އަށް ކުރަނީ ގަސްތުގައި މީހަކު މަރާލުމުގެ ކުށުގެ ދައުވާ އެވެ. ލަމްހާއަށް ކުރަނީ މީހަކު މަރާލުމުގައި ބައިވެރިވުމުގެ ކުށުގެ ދައުވާ އާއި ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގައި ކުރުމުގެ ކުށުގެ ދައުވާގެ އިތުރުން އެހެން މީހެއްގެ މުދަލެއްގެ މައްޗަށް ހުއްދަ ނޫންގޮތެއްގައި ބާރުހިންގުމުގެ ކުށުގެ ދައުވާ އެވެ.
