ރިޔާސީ އިންތިޚާބުގައި ދެވަނަ ބުރެއް ނުބާއްވާ އެއްބުރުން ރައީސް ހޮވުމަށް ދިރާސާކުރަން އުޅޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ.
ރައީސް މިހެން ވިދާޅުވީ ޖުމްހޫރީ ދުވަހުގެ މުނާސަބަތުގައި މިރޭ ބޭއްވި ޖަލްސާގައި ވާހަކަފުޅު ދައްކަވަމުން ނެވެ.
ރައީސް މުޢިއްޒު ވިދާޅުވީ ޕްރިފަރެންޝަލް ވޯޓިންގ ނިޒާމް ރާއްޖޭގައި ތަޢާރަފުކުރުމާ ގުޅޭގޮތުން އެޓަރނީ ޖެނެރަލްގެ އޮފީހަށް ދިރާސާކުރުމަށް ފޮނުވާފައިވާ ކަމަށެވެ. މި ނިޒާމަކީ ބައެއް ޤައުމުތަކުގައި ޢަމަލުކުރަމުންދާ ނިޒާމެއް ކަމަށާއި، މިއީ ޚަރަދު ކުޑަ ގޮތެއްކަންވެސް އެމަނިކުފާނު ފާހަގަކުރެއްވި އެވެ.
”ބައެއް ޤައުމުތަކުގައި އޮންނަ ނިޒާމެއް ޕްރިފަރެންޝަލް ވޯޓިންގ ސިސްޓަމަކީ. އަޅުގަނޑު ދެކޭގޮތުގައި ދެވަނަ ބުރަކަށް ނުގޮސް، ފުރަތަމަ ބުރެއްގައި ޕްރިފަރެންޝަލް ވޯޓިންގއިން ދެވަނަ ބުރަކަށް ދާ ހާލެއްގައި ހޮވާނެ މީހަކު އެނގޭ ގޮތަށް ވޯޓުލެވޭގޮތަށް. މާނައަކީ އެއްބުރުން އެއްވަނަ ދެވަނަ ސާފުވާގޮތަށް,“ ރައީސް މުޢިއްޒު ވިދާޅުވި އެވެ.
މި ނިޒާމުގައި ވޯޓުލާ ފަރާތްތަކުން ކެންޑިޑޭޓުން ރޭންކުކުރަނީ އިސްކަންދޭ ތަރުތީބުންނެވެ. އިންތިޚާބު ނިމުމުން އެންމެ ގިނައިން އެއްވަނަ ދަރަޖަ ލިބޭ ކެންޑިޑޭޓަކު ރައީސްކަމަށް ހޮވޭ ގޮތަށެވެ.
ރައީސް މުޢިއްޒު އިތުރަށް ވިދާޅުވީ މި ބަދަލު ގެނައުމުގެ ކުރިން ދިރާސާކޮށް، ރައްޔިތުންގެ މަޖިލިސް މެދުވެރިކޮށް ރައްޔިތުންގެ ރުހުން ހޯދާނެ ކަމަށެވެ. އަދި މި ބަދަލު ގެނެވިއްޖެނަމަ، ދެން އޮންނަ ރިޔާސީ އިންތިޚާބުން ފެށިގެން ތަންފީޒުކުރެވޭނެ ކަމަށްވެސް އެމަނިކުފާނު ވިދާޅުވި އެވެ.
މީގެ އިތުރުން، ކައުންސިލަރުންގެ އަދަދު މަދުކުރުމާއި، ރިޔާސީ އިންތިހާބާއި މަޖިލިސް އިންތިހާބު އެއްކޮށް ބޭއްވުމާ ގުޅޭގޮތުންވެސް ދިރާސާކުރަމުންދާ ކަމަށް ރައީސް މުޢިއްޒު ހާމަކުރެއްވި އެވެ. ނަމަވެސް މި ބަދަލުތައް ގެނައުމުގައިވެސް ރައްޔިތުންގެ ފެންނަ ނުފެންނަ ވޯޓެއް ނަގާނެ ކަމަށް އެމަނިކުފާނު ވިދާޅުވި އެވެ.
ދެވަނަ ބުރު ބޭއްވުމާއި ގުޅޭގޮތުން ރޭ ރައީސް ހިޔާލު ފާޅުކުރައްވާފައިވާއިރު އިލެކްޝަންސް ކޮމިޝަންގެ ރައީސް ފުވާދު ތައުފީގުވެސް ވަނީ މި ހިޔާލަށް ތާއީދުކުރައްވާ ކަމަށް މީގެ ކުރިން ވިދާޅުވެފަ އެވެ. ސެޕްޓެމްބަރު މަހު ”ޖަވިޔަނި“ އަށް ދެއްވި ހާއްސަ އިންޓަވިއުއެއްގައި ވާހަކަދައްކަވަމުން ފުވާދު ވިދާޅުވީ މީގެ ކުރީގެ ވެރިކަންތަކުގައިވެސް އީސީ އިން މިގޮތަށް ދެވަނަ ބުރު ނުބޭއްވުމަށް ލަފާދީ މަޝްވަރާކުރި ނަމަވެސް، އެއްވެސް ސަރުކާރަކުން އެ މަޝްވަރާ ބަލައިގެންފައި ނުވެ އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޖުމްހޫރީ ދުވަސް
