ފުވައްމުލަކުން 4 އަހަރުގެ ކުއްޖަކު ގެއްލިގެން އެ ކުއްޖާ ހޯދުމުގެ މަސައްކަތް ފަށައިފި އެވެ.
ފުލުހުން މީޑިއާތަކަށް ފޮނުވި މެސެޖެއްގައި ބުނެފައިވަނީ ގެއްލިފައިވަނީ 4 އަހަރުގެ ފިރިހެން ކުއްޖެއް ކަމަށެވެ. އަދި އެ ކުއްޖާ ހޯދުމުގެ މަސައްކަތް ފުލުހުން މިހާރު ކުރަމުންދާ ކަމަށްވެސް ބުނެފައިވެ އެވެ.
ގެއްލިގެން ހޯދަމުން ދަނީ ޏ. ފުވައްމުލައް، މިސްކިތްމަގު، މާކޯނި އިޒްޔާން ހުޝާމް މުޙައްމަދު (4އ) އެވެ.
މި ކުއްޖާ އެންމެ ފަހުން ފެނިފައިވަނީ މިއަދު 16:45 އެހައިކަންހާއިރު، ފުވައްމުލައް ދިގުވާޑު ފުލެޓް ނަންބަރު 02.ޖީ.18 ފުލެޓް ފަހަތުންނެވެ. އެންމެ ފަހުން ކުއްޖާ ފެނުނު އިރު އެ ކުއްޖާ ލައިގެން ހުރީ ނަންބަރު 10 ޖަހާފައިވާ ކަޅުކުލައިގެ ޖާޒީއެކެވެ.
އިޒްޔާންގެ އެއްވެސް މަޢުލޫމާތެއް ލިބިފައިވާ ފަރާތްތަކުން ފުވައްމުލައް ޕޮލިސް ސްޓޭޝަނުގެ ނަންބަރު 9792803 އަށް ގުޅައި އެ މަޢުލޫމާތު ހިއްސާކޮށްދިނުމަށް ފުލުހުން އެދިވަޑައިގެންފައިވެ އެވެ.
ފުލުހުން ވަނީ މި ކުއްޖާ ހޯދުމަށް އާންމު ރައްޔިތުންގެ އެހީއަށް އެދިފަ އެވެ. އަދި މި މައްސަލައާ ގުޅޭ އިތުރު މައުލޫމާތު ލިބުމުން އާންމު ކުރާނެކަމަށްވެސް ފުލުހުން ބުނެ އެވެ.
