ރަސްމާލެ (ފުށިދިއްގަރު ފަޅު) ހިއްކުމުުގެ މަސައްކަތް އަލުން ފަށައިފި އެވެ.
ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ބުނީ ރަސްމާލެ ހިއްކުމުގެ މަސައްކަތް އަލުން ފަށާފައިވާ ކަމަށެވެ. އަދި މިފަހަރު ހިއްކަން ފަށާފައިވަނީ ރަސްމާލޭގެ ސަރަހައްދ،ު އެފް ކަމަށް އެ ކުންފުނިން ބުންޏެވެ.
ރަސްމާލެ ހިއްކައި، ތަރައްޤީކުރުމަށް ހަމަޖެހިފައިވަނީ އެކި ފިޔަވަހިތަކަށް ބަހާލައިގެން، ވަކި ސަރަހައްދުތަކެއް ކަނޑައަޅައިގެންނެވެ.
މީގެކުރިން ރަސްމާލެއިންނާއި، ހުޅުމާލެއިން ބޮޑު ބިމެއްދޭގޮތަށް ރަސްމާލެ ހިއްކުރުމުގެ މަސައްކަތް ކުރިއަށްގެންދިޔަ ނަމަވެސް، މިހާރު އެ މަސައްކަތް ކުރިއަށްގެންދަނީ ސަރުކާރުގެ ހަރަދުގަ އެވެ. އަދި އެ މަސައްކަތް ކުރިއަށްގެންދިއުމަށް ހަމަޖެހިފައިވަނީ ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ) ގެ ދަށުން، ސަރުކާރުގެ އެހެން ކުންފުނިތަކުގެ ވެސް އެހީއާ އެކުގަ އެވެ.
މި މަޝްރޫއުގެ މަސައްކަތް އެއްކޮށް ނިންމާލެވޭއިރު، ޖުމްލަ 1،153 ހެކްޓަރުގެ ބިން ހިއްކާނެކަމަށް ސަރުކާރުން މީގެކުރިން ހާމަކށްފައިވެ އެވެ. އެ ތަން ހިއްކަނީ ކަނޑުގެ ލޮނުގަނޑުން ފެށިގެން 2.5 މީޓަރު އަދި މެދަށް 3 މީޓަރުގެ އުސްމިނަށެވެ.
ރަސްމާލެއަކީ، ރައީސް ޑރ. މުހައްމަދު މުއިއްޒުގެ އެންމެ ބޮޑު އެއް ވައުދާއި ގުޅިފައިވާ ބިމެވެ. އެގޮތުން ރަސްމާލެ ހިއްކައި ނިންމަވައި، އެ ސަހަރުގައި ބޯހިޔާވެހިކަމަށް ބޭނުންވާ އެންމެންނަށް ބޯހިޔާވެހިކަން ދެއްވުމަކީ ރައީސް ޑރ. މުހައްމަދު މުއިއްޒުގެ ރިިޔާސީ ވައުދެކެވެ. ރަސްމާލެ ހިއްކާ ނިންމާއެކު ސަރުކާރުން ވަނީ އެ ސަހަރުގައި ބޯހިޔާވެހިކަމަށް 65،000 ހައުސިން ޔުނިޓް ތަރައްޤީކުރުމަށްވެސްް ނިންމާފަ އެވެ.
