ޖުމްހޫރީ ދުވަހުގެ މުނާސަބަތުގައި ބާއްވާ ރަސްމީ ޖަލްސާގައި 40 ފަރާތަކަށް ރައީސުލްޖުމްހޫރިއްޔާގެ ޚާއްސަ އިނާމު އަދި 53 ފަރާތަކަށް ދައުލަތަށް ހިދުމަތް ކުރުމުގެ އިނާމު ދެއްވުމަށް ހަމަޖެހިފައިވާކަމަށް ރައީސް އޮފީހުން ހާމަކޮށްފި އެވެ.

މިރޭ 8:00 ގައި ދަރުބާރުގޭގައި ބާއްވާ މި ޖަލްސާގައި ދެއްވާ އިނާމުތައް ލިބޭ ފަރާތްތައް ހޮވާފައިވަނީ ގައުމީ އިނާމާ ބެހޭ ކޮމިޓީންނެވެ.

މި ޖަލްސާގައި އިސްލާމިކް ޔުނިވަރސިޓީގެ ޗާންސެލަރ ޑރ. މުޙައްމަދު ޒާހިރު ޙުސައިނަށް އިއްޒުއްދީނުގެ އިއްޒަތުގެ ވެރިޔާގެ ޝަރަފު އެރުވުން އޮންނާނެ އެވެ. މި ޝަރަފު އެރުވުމަށް ހަމަޖެހިފައި ވަނީ ރާއްޖޭގެ ތަޢުލީމީ ދާއިރާގެ ތަރައްޤީއާއި ތަޢުލީމު ފުޅާކުރުމަށް އެމަނިކުފާނު ކޮށްދެއްވާފައިވާ ގިނަގުނަ ހިދުމަތްތަކަށްޓަކާ އެވެ.

ރާއްޖޭގައި ޖުމްހޫރީ ދުވަސް ފާހަގަކުރަމުން މިދަނީ 1968 ވަނަ އަހަރާ ހަމައަށް ދެމިއޮތް އައްސުލްޠާން މުޙައްމަދު ފަރީދުގެ ރަސްކަން ނިމުމަކަށް ގެނެސް، ރާއްޖޭގެ ދެވަނަ ޖުމްހޫރިއްޔާ ޤާއިމްކުރެވި، 1968 ވަނަ އަހަރުގެ ނޮވެމްބަރު 11 ވަނަ ދުވަހު އިބްރާހީމް ނާޞިރު ރައީސުލްޖުމްހޫރިއްޔާގެ މަޤާމަށް އިންތިޚާބުވުމާ ގުޅުވައިގެންނެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރައީސް އޮފީސް ޖުމްހޫރީ ދުވަސް