ދިވެހިން ހޮސްޕިޓާލިޓީ ދާއިރާ މަތީތައުލީމް ހާސިލްކުރުމަށް ރާއްޖެ ދޫކޮށްފައި ދާންޖެހޭ ސަބަބެއް ނޯންނާނެ ކަމަށް ޓޫރިޒަމް މިނިސްޓަރ އިބްރާހީމް ފައިސަލް ވިދާޅުވެއްޖެ އެވެ.

މިނިސްޓަރ މިހެން ވިދާޅުވީ އިއްޔެ ބޭއްވުނު 5 ތަރީގެ ޓްރޭނިން ރިސޯޓް ތަރައްޤީ ކުރުމަށް ފަހުމުނާމާގައި ސޮއިކުރުމުގެ ރަސްމިއްޔާތުގައި ވާހަކަ ދައްކަވަމުން ނެވެ.

މިނިސްޓަރ ފައިސަލް ވިދާޅުވި ގޮތުގައި ”މޯލްޑިވްސް“ އޭ ބުނުމުން ދުނިޔޭގެ ފަތުރުވެރިންނަށް ސިފަވަނީ ރާއްޖޭގެ ރީތިކަމާއި ހޮސްޕިޓާލިޓީ އެވެ. އެހެންކަމުން ދިވެހި ކުއްޖަކު ނުވަތަ ޒުވާނަކު ހޮސްޕިޓާލިޓީ ދާއިރާއިން މަތީ ތައުލީމް ހާސިލްކުރުމަށް ދުނިޔޭގެ އެހެން ޤައުމަކަށް ނުވަތަ ޔުނިވަރސިޓީއަކަށް ދާންޖެހޭ ސަބަބެއް އޮވެގެން ނުވާނެ ކަމަށް އޭނާ ވިދާޅުވި އެވެ.

މީގެ އިތުރުން، މިނިސްޓަރ ފާހަގަކުރެއްވި ގޮތުގައި ރާއްޖޭގެ ރިސޯޓްތަކަށް އަންނަ ބައެއް ފަތުރުވެރިންނަކީ ދުނިޔޭގެ ބިލިޔަނަރުން ނެވެ. މިފަދަ މަތީ ފަންތީގެ ފަތުރުވެރިންނަށް ޚިދުމަތް ދިނުމުގެ ތަޖުރިބާއަކީ ދުނިޔޭގެ އެއްވެސް ޔުނިވަރސިޓީއަކުން ދެވިދާނެ އެއްޗެއް ނޫން ކަމަށްވެސް އޭނާ ވިދާޅުވި އެވެ.

ރާއްޖޭގައި 5 ތަރީގެ ޓްރެއިނިން ރިސޯޓެއް ޤާއިމްކުރެވިގެންދާއިރު، އެތަން ވެގެންދާނީ ދުނިޔޭގެ އެކި ޤައުމުތަކުގެ ކުދިން އައިސް ހޮސްޕިޓާލިޓީ ކޯސްތައް ކިޔަވާ، މަޝްހޫރު ތަނަކަށް ކަމުގެ ޔަޤީންކަން މިނިސްޓަރ ފާޅުކުރެއްވި އެވެ. އަދި ދިވެހިރާއްޖެ އައްވުރެ ރަނގަޅަށް ހޮސްޕިޓާލިޓީ ޓްރެއިނިން ސްކޫލެއް ހިންގޭނެ އެހެން ޤައުމެއް ނޯންނާނެ ކަމަށްވެސް މިނިސްޓަރު ވިދާޅުވި އެވެ.

މި ސްކޫލަކީ ދުނިޔޭގެ ތާރީޚުގައި ފާހަގަކޮށްލެވޭ ވަރުގެ 5 ސްޓަރ ޓްރެއިނިން ސްކޫލަކަށް ވެގެންދާނެ ކަމުގެ އުއްމީދު މިނިސްޓަރ ފައިސަލް ފާޅުކުރެއްވި އެވެ. މިކަމުގެ ސަބަބުން ރާއްޖޭގެ ޒުވާނުންނަށް ހޮސްޕިޓާލިޓީ ދާއިރާއިން ރާއްޖޭގައި ތަޢުލީމު ހާސިލުކުރުމުގެ ފުރުސަތު ފަހިވެގެންދާނެ ކަމަށް ބެލެވެ އެވެ.

ފަތުރުވެރިކަން ދިވެހިރާއްޖޭގެ ގައުމީ ޔުނިވާސިޓީ ޓުއަރިޒަމް މިނިސްޓަރު އިބްރާހީމް ފައިސަލް