އައްޑޫ ސިޓީ ހަންކެޑެއާއި ގައުކެނޑި ގުޅޭ ކޯޒްވޭގައި ދަންޖެހިފައި ހުއްޓާ މިއަދު ހެނދުނު ފެނުނު މީހަކީ އެއްވެސް މައްސަލައެއްގެ ސިއްރު ހެއްކެއް ނޫންކަމަށް ފުލުހުން ބުނެފި އެވެ.
ދަންޖެހި މަރުވެފައި ހުއްޓާ ފެނުނީ އުމުރުން 19 އަހަރުގެ އަހްމަދު އަޔާން ފިކުރީއެވެ.
ފުލުހުން މިހެން ބުނެފައިވަނީ އެކްސްގައި ކާކުކަން ނޭންގޭ ގޮތަށް ހިންގަމުންދާ ހަސަން ކުރުސީ އެކައުންޓުގައި ކޮށްފައިވާ ޕޯސްޓަކާ ގުޅިގެންނެވެ. އެ ޕޯސްޓުގައި ބުނެފައިވާ ގޮތުން އައްޑޫގައި ދަންޖެހިފައި ހުއްޓާ ފެނުނު މީހާ އަކީ 2020 ވަނަ އަހަރު ހިނގި މާރާމާރީ މައްސަލައެއްގައި ސިއްރު ހެއްކެއްގެ ގޮތުގައި ހުށަހެޅި ހެއްކެކެވެ. އަދި އޭނާގެ ވަނަވަރު އެ ރަށު ގޭންގަކަށް ލީކުކޮށްލީ ގާޒީއެއްކަމަށްވެސް ބުނެފައިވެ އެވެ.
މީގެ އިތުރުން އޭނާގެ ގައިގައި އަނިޔާކޮށްފައިވާކަމުގެ ނިޝާންތައް ފެންނަން ހުރިކަމަށްވެސް ކުރުސީގެ ޕޯސްޓުގައި ބުނެފައިވެ އެވެ.
ފުލުހުން މީޑިއާތަކަށް ފޮނުވި މެސެޖުގައި ބުނެފައިވަނީ މިއީ އެއްވެސް ހަގީގަތެއް ނެތް ވާހަކަތަކެއް ކަމަށެވެ. އެގޮތުން ނިޔާވެފައިވާ މީހަކީ އެއްވެސް މައްސަލައެއްގައި ހެއްކެއްގެ ގޮތުގައި ގެނެސްފައިވާ މީހެއް ނޫން ކަމަށާއި ތުހުމަތު ކުރެވޭ އެއްވެސް މައްސަލައެއް އޮތް މީހެއްވެސް ނޫން ކަމަށެވެ.
ނިޔާވެފައިވާ މީހަކާ ގުޅޭ ގޮތުން އެއްވެސް ހަގީގަތެއް ނެތް ދޮގު މައުލޫމާތު ފެތުރުން ހަރުކަށި އިބާރާތުން ކުއްވެރި ކުރަން.
މި މައްސަލައާ ގުޅިގެން ބަލަން ޖެހޭ ކަންކަން ބަލަމުން ގެންދާކަމަށްވެސް ފުލުހުން ވަނީ ބުނެފަ އެވެ.
