ތުރުކީއާ އެކު ސޮއިކުރި ވިޔަފާރީގެ އެއްބަސްވުމުގެ ދަށުން، ރާއްޖޭގެ ވިޔަފާރިތައް ޔޫރަޕްގެ މާކެޓްތަކާ ގުޅުވައިލުމަށް މަގުފަހިވާނެ ކަމަށް މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް މުހައްމަދު ސައީދު ވިދާޅުވެއްޖެ އެވެ.
ވަޒީރު މިހެން ވިދާޅުވީ އިއްޔެ ބޭއްވުނު މޯލްޑިވްސް އިސްލާމިކް ބޭންކް (އެމްއައިބީ)ގެ ހިދުމަތް މުޅި ރާއްޖެއަށް ފުޅާކުރުމުގެ ރަސްމިއްޔާތުގައި ވާހަކަ ދައްކަވަމުންނެވެ. މި ރަސްމިއްޔާތުގައި މިނިސްޓަރު ސައީދު ވަނީ އިގްތިސާދު ޑިޖިޓަލައިޒް ކުރުމަށް ސަރުކާރުން ކުރަމުންދާ މަސައްކަތްތަކަށް އަލިއަޅުއްވާލައްވާފަ އެވެ.
މިނިސްޓަރު ސައީދު ވިދާޅުވި ގޮތުގައި ބައިނަލްއަގްވާމީ މާކެޓްތަކަށް ދިވެހި އުފެއްދުންތައް އެކްސްޕޯޓް ކުރުމަށް މަގުފަހިވާނެ ނިޒާމެއް ގާއިމް ކުރުމަށް ސަރުކާރުން މަސައްކަތް ކުރަމުންދެ އެވެ. އަދި ބައިނަލްއަގްވާމީ މާކެޓްތައް ރައްކާތެރި ކުރުމަށް ބޭނުންވާ އީ-ވޮލެޓާއި އެހެނިހެން މުހިންމު ވަސީލަތްތައް ތައާރަފް ކުރުމަށް ސަރުކާރުން ވަރުބަލިކަމެއް ނެތި މަސައްކަތް ކުރަމުންދާ ކަމަށް އޭނާ ފާހަގަކުރެއްވި އެވެ.
މިނިސްޓަރު ސައީދު އިތުރަށް ވިދާޅުވި ގޮތުގައި މި މަސައްކަތްތަކުގެ ދަށުން ރާއްޖެ އާއި ތުރުކީއާ ދެމެދު ވެފައިވާ އެއްބަސްވުމަކީ ދިވެހި ވިޔަފާރިތައް ޔޫރަޕްގެ މާކެޓްތަކާ ގުޅުވައިދިނުމުގައި ވަރަށް މުހިންމު ދައުރެއް އަދާކުރާނެ އެއްބަސްވުމެކެވެ.
ވިޔަފާރީގެ ގުޅުން ބަދަހި ކުރުމަށް ރާއްޖެ އާއި ތުރުކީ މިނިވަން ވިޔަފާރީގެ އެއްބަސްވުމެއްގައި ސޮއިކުރީ، ރައީސް ޑރ. މުހައްމަދު މުއިއްޒު ތުރުކީއަށް ކުރެއްވި ރަސްމީ ދަތުރުފުޅުގައި، ނޮވެމްބަރު 2023 ގައި ކަމެވެ. މި އެއްބަސްވުމުގެ ސަބަބުން ރާއްޖޭގެ ވިޔަފާރިތަކަށް ޔޫރަޕްގެ މާކެޓްތަކަށް ވަނުމަށް އިތުރު ފުރުސަތުތަކެއް ހުޅުވިގެންދާނެ ކަމަށް ބެލެވެ އެވެ.
އިކޮނޮމިކް މިނިސްޓަރު މުހައްމަދު ސައީދު މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް
