އެކްސްކާޝަނަކަށް ގޮސް ހުއްޓާ ދޯންޏެއްގެ ބުރަފަތީގައި ޖެހި އަންހެން ފަތުރުވެރިޔަކު މަރުވެއްޖެ އެވެ.
މިއަދު ހެނދުނު 9:55 ގައި މި ހާދިސާ ފުލުހުންނަށް ރިޕޯޓްކޮށްފައިވަނީ އދ. ދިގުރަށް ކައިރިން ނެވެ.
ދިގުރަށު ސިއްހީ މަރުކަޒުން ބުނީ މަރުކަޒަށް ގެނެސް އީސީޖީ ހެދިއިރު ވެސް އޭނާގެ ވިންދު ނެތް ކަމަށް މައުލޫމާތު ލިބިފައި ވެއެވެ. އަދި ހަށިގަނޑުގެ އެކި ތަންތަން ކަފައިގެން ގޮސްފައިވާ ކަމަށް ދިގުރަށު ކައުންސިލުން ބުނެފައި ވެއެވެ.
ނިޔާވި އަންހެން ފަތުރުވެރިޔަކީ ސިންގަޕޫރަށް ނިސްބަތްވާ 15 އަހަރުގެ އަންހެން ކުއްޖެއް ކަމަށް ފުލުހުން ބުންޏެވެ. އޭނާ މަރުވީ ދޯނިން ފުންމާލި ވަގުތު، ދޯނީގެ ބުރަފަތީގައި ޖެހިގެން ނެވެ.
މިހާރު ފުލުހުން ދަނީ މި މައްސަލަ ތަހުގީގު ކުރަމުން ނެވެ.
