ހެލްތް އެކްސްޕޯ 2024 ފަށައިފި އެވެ.

ހުޅުމާލޭ ސެންޓްރަލް ޕާކުގައި ބޭއްވޭ މި އެކްސްޕޯ ހުޅުވައިދެއްވީ ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފެވެ.

މިނިސްޓްރީ އޮފް ހެލްތުން އިންތިޒާމުކޮށްގެން ބާއްވާ މި އެކްސްޕޯގެ މަޤްޞަދަކީ ދުޅަހެޔޮ މުޖުތަމައެއް ބިނާކުރުމަށް ސިއްޙީ ދާއިރާއިން ކުރަމުންދާ މަސައްކަތްތަކާއި، ސިއްޙީ ގޮތުން ދުޅަހެޔޮ އާދަތަކަށް އާންމުން ހޭލުންތެރިކުރުމާ ގުޅޭ މަޢުލޫމާތު ރައްޔިތުންނަށް ފޯރުކޮށްދިނުމެވެ. މި އެކްސްޕޯ ކުރިއަށްދާނީ 2 ދުވަހުގެ މުއްދަތަށެވެ.

އެކްސްޕޯ ހުޅުވުމުގެ ރަސްމިއްޔާތުގައި ރައީސުލްޖުމްހޫރިއްޔާގެ ނައިބު ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވެރިކަމުގައި ސިއްޙީ ދާއިރާއިން ކުރައްވާފައިވާ މަސައްކަތްތަކުގެ ވަނަވަރު ހިމެނޭ ”ހަފުތާ 52“ އާންމުކޮށްދެއްވާފަ އެވެ. އަދި އެކްސްޕޯގައި ބަހައްޓާފައިވާ ސްޓޯލްތަކަށް ޒިޔާރަތްކުރައްވައި ބައްލަވާލައްވާފައިވެ އެވެ.

މި އެކްސްޕޯގައި މާލެ ސަރަޙައްދުގެ ހޮސްޕިޓަލްތަކާއި، ކްލިނިކްތަކާއި އަދި ޖަމްޢިއްޔާ ޖަމާޢަތްތައް ހިމެނޭގޮތަށް ސިއްޙީ ދާއިރާގެ އެކިއެކި ފަރާތްތަކުން ބައިވެރިވެފައިވެ އެވެ. އެކްސްޕޯގައި ޖުމްލަ 50 ސްޓޯލް ގާއިމުކޮށްފައިވާއިރު، މި ސްޓޯލްތަކުން އާންމުންނަށް މަޢުލޫމާތު ލިބޭނެ އިންތިޒާމު ސިއްޙަތާބެހޭ ވުޒާރާއިން ވަނީ ހަމަޖައްސަވައިދެއްވާފަ އެވެ.

ހެލްތް އެކްސްޕޯ 2024 އަކީ ރާއްޖޭގެ ސިއްޙީ ދާއިރާގެ ތަރައްޤީއަށް އަލިއަޅުވާލައި، އާންމު ރައްޔިތުންގެ ހޭލުންތެރިކަން އިތުރުކުރުމަށް މުހިންމު ދައުރެއް އަދާކުރާނެ ހަރަކާތެއް ކަމަށް ބެލެވެ އެވެ.

ހެލްތް އެކްސްޕޯ 2024 ހެލްތް މިނިސްޓަރ އަބްދުﷲ ނާޒިމް އިބްރާހިމް ރައީސުލްޖުމްހޫރިއްޔާގެ ނައިބު އަލްއުސްތާޛު ހުސައިން މުހައްމަދު ލަތީފް މިނިސްޓްރީ އޮފް ހެލްތް