މަދަނީ އިޖުރާއަތުގެ ގާނޫނަށް އިސްލާހު ގެނައުމުގެ ބިލް ބަންޑާރަނައިބުގެ އޮފީހަށް ފޮނުވައިފި އެވެ.
ޖުޑީޝަލް ސަރވިސް ކޮމިޝަން (ޖޭއެސްސީ) އިން މައުލޫމާތު ދެއްވިގޮތުގައި މަދަނީ އިޖުރާއަތުގެ ގާނޫނު ތަސްދީގުކޮށްފައިވަނީ 16 ޑިސެންބަރު 2021 ގަ އެވެ. މި ގާނޫނަށް އަމަލުކުރަން ފެށީ ދިވެހި ސަރުކާރުގެ ގެޒެޓްގައި ޝާއިއުކުރެވުނުތާ 6 މަސް ފަހުން ނެވެ. ނަމަވެސް މި ގާނޫނަށް އަމަލުކުރަން ފެށުމާއެކު، ރާއްޖޭގެ ކޯޓުތަކުގައި މަދަނީ މައްސަލަތައް ތޮއްޖެހި، މައްސަލަތައް ލަސްވެ އަދި މައްސަލަތަކުގެ ހުކުމްތައް ތަންފީޒުނުވެ މުޅި ނިޒާމަށް މިހާތަނަށް ކުރިމަތިނުވާ ވަރުގެ ދަތިތަކެއް ކުރިމަތިވެފައިވާ ކަމަށް ޖޭއެސްސީ އިން ވަނީ ފާހަގަކޮށްފަ އެވެ.
ޖޭއެސްސީ އިން އިތުރަށް ބުނީ މި ގާނޫނުގެ ސަބަބުން ބޭންކުތަކާއި ވިޔަފާރި އިންސްޓިޓިއުޝަންތައް އަދި އާންމު ރައްޔިތުންގެ ވިޔަފާރިތައް ހުއްޓި، މަދަނީ އަދުލުގެ ނިޒާމަށް ކުރިމަތިވެފައިވާ މައްސަލަތަކަށް ހައްލެއް ހޯދެން އޮތީ މިހިނދުން މިހިނދަށް ގާނޫނަށް އިސްލާހުތަކެއް ގެނެވިގެން ކަމަށެވެ.
ޖޭއެސްސީ އިން މައުލޫމާތު ދެއްވިގޮތުގައި މި އިސްލާހުތައް ގެނެވިފައިވަނީ ޖުޑީޝަލް ސަރވިސް ކޮމިޝަންގެ އިސްނެގުމުގެމަތިން، ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީ އާއި، އިންޓަނޭޝަނަލް ބެސްޓް ޕްރެކްޓިސްއާ އެއްގޮތަށެވެ.
މި މަހުގެ 4 ވަނަ ދުވަހު ބޭއްވުނު ކޮމިޝަންގެ 57 ވަނަ ޖަލްސާގައި ވަނީ ބަންޑާރަނައިބު މެދުވެރިކޮށް މި ގާނޫނު އިސްލާހުކުރުމުގެ ބިލް ރައްޔިތުންގެ މަޖިލީހުގެ އިދާރާއަށް ފޮނުވުމަށް ނިންމާފައެވެ. އަދި މިއަދު މި އިސްލާހުތައް ބަންޑާރަނައިބުގެ އޮފީހަށް ވަނީ ހުށަހަޅާފަ އެވެ.
މި އިސްލާހުތަކުގެ ސަބަބުން މަދަނީ އަދުލުގެ ނިޒާމަށް ދިމާވެފައިވާ ގިނަ މައްސަލަތަކަށް ހައްލު ލިބި، ކޯޓުތަކުގެ މަސައްކަތް އަވަސްވެ، ހުކުމްތައް ތަންފީޒުކުރުމަށް ފަސޭހަވާނެ ކަމަށް އުއްމީދު ކުރެވެ އެވެ.
ރައްޔިތުންގެ މަޖިލިސް ބަންޑާރަ ނައިބުގެ އޮފިސް ޖުޑިޝަލް ސާވިސް ކޮމިޝަން (ޖޭއެސްސީ)
