މި ސަރުކާރުގެ ފުރަތަމަ ތިން އަހަރު ނިމޭއިރު ކްލޯޑް ސްޓޯރޭޖްގެ މައްސަލަ ހައްލުކުރެވި، މަސްވެރިންގެ ހުރި ކަންބޮޑުވުންތަކަށް ހައްލު ގެނެސްދެވޭނެ ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.
މިނިސްޓަރ މިގޮތަށް ވިދާޅުވީ މިއަދު ލޮނު ފެނުން މަސް ފިނިކުރާ ނިޒާމްކަމުގައިވާ އާރް.އެސް.ޑަބްލިއު ފައިނޭންސިންގ ފެސިލިޓީގެ ބެނިފިޝަރީޒްއަށް އެވޯޑް ލެޓަރ ހަވާލުކުރުމާއި، ގއ. ކޫއްޑޫ ކޯލްޑް ސްޓޯރޭޖް އެކްސްޕެންޝަން ޕްރޮޖެކްޓްގައި ސޮއިކުރެއްވުމުގެ ރަސްމިއްޔާތުގައި ވާހަކަދައްކަވަމުން ނެވެ.
މި ރަސްމިއްޔާތުގައި ވާހަކަދައްކަވަމުން ރާއްޖޭގައި މަސް ފިނިކުރުމުގެ ނިޒާމް އެކަށޭނަ ވަރަަކަށް ނެތުމަކީ މަސްވެރިކަމުން ނަފާ ހޯދުމަށް އެޅޭ ހުރަހެއް ކަން މިނިސްޓަރު ފާހަގަކުރައްވާފައި ވެއެވެ. މިނިސްޓަރ ވިދާޅުވީ މުޅި ރާއްޖޭގައި މަސްވެރިކަމުގެ ސިނާއަތް ފުޅާކުރުމަށް ސަރުކާރުން ވިސްނާފައިވާއިރު މި ފެސިލިޓީތައް ގާއިމުކުރެވުމުން މަސްވެރިން ދުރަށް ދުއްވާކަށް ނުޖެހޭނެ ކަމަށެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ރާއްޖޭގެ ކޯލްޑް ސްޓޯރޭޖްގެ ކެޕޭސިޓީ ދެގުނަ ކުރުމަށް ވައުދުވެވަޑައިގެންފަ އެވެ. މި މަސައްކަތުގެ ދަށުން ކޫއްޑޫގައި 4500 ޓަނުގެ ކޯލްޑް ސްޓޯރޭޖް ކެޕޭސިޓީއެއް ބިނާކުރުމަށް ސަރުކާރުން ވަނީ މިއަދު ކުންފުންޏަކާއިއެކީ އެއްބަސްވެފަ އެވެ. ޝިޔާމް ވިދާޅުވީ 10 ދުވަސް ތެރޭގައި 4500 ޓަނުގެ ކޯލްޑް ސްޓޯރޭޖް އިތުރުކުރުމުގެ މަސައްކަތް ސަރުކާރުން ފަށާފައިވާ ކަމަށެވެ.
“ ޕްރޮސެސިން ކެޕޭސިޓީ އިތުރުކުރުމަށް ހުރި ކަންތައްތަކާއި އެކީގައި ކުރިން އަޅުގަނޑު ދެންނެވިހެން ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ދައުރުގެ ފުރަތަމަ 3 އަހަރު ނިމޭއިރު އިރާދަކުރެއްވިއްޔާ އަޅުގަނޑުމެންނަށް ދިވެހިރާއްޖޭގެ ކޯލްޑް ސްޓޯރޭޖްގެ ޓޯޓަލް ކެޕޭސިޓީީ އިރާދަކުރެއްވިއްޔާ 25،000 އަށްްވުރެ ގިނަވާނެ“
މީގެ އިތުރުން، މަސްކިރާ ބަނދަރަށް ތާޒާކޮށް ގެންނަ މަސް ފިނިކޮށް ރައްކާކުރާނެ ކޯލްޑް ސްޓޯރޭޖްތައް އިތުރުކުރުމަކީ ސަރުކާރުގެ އަމާޒެކެވެ. އަދި މަސްވެރި ސިނާޢަތުގައި އިޤްތިޞާދީ ނަފާ އިތުރުކުރުމަކީވެސް ރައީސުލްޖުމްހޫރިއްޔާގެ ވަރަށް މުހިންމު ސިޔާސަތެކެވެ.
ރާއްޖޭގައި މިވަގުތު ހުރި 8500 ޓަނުގެ ކޯލްޑް ސްޓޯރޭޖް ކެޕޭސިޓީ ދެގުނަކުރުމަކީ ރައީސުލްޖުމްހޫރިއްޔާގެ ރިޔާސީ ވަޢުދެކެވެ. އަދި ސަރުކާރުން މިހާރު އަމާޒު ހިފާފައިވަނީ މިހާރު ހުރި ކެޕޭސިޓީ ތިން ގުނަ އިތުރުކޮށް ފަންސަވީސް ހާސް ޓަނަށް އިތުރުކުރުމަށެވެ.
މި މަޝްރޫޢާއެކު، މަސްވެރިކަމުގެ ދާއިރާގައި ކުރިއެރުންތަކެއް ލިބި، މަސްވެރިންނަށް އިތުރު ފައިދާތަކެއް ކުރާނެކަމަށް އުންމީދުކުރެވެ އެވެ.
މިނިސްޓަރު އަހްމަދު ޝިޔާމް މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް
