މީސްމީޑިއާގައި ފެތުރޭ ދޮގު މަޢުލޫމާތަކީ ތެދު މަޢުލޫމާތަށް ވުރެން ހަ ގުނަ ބާރަށް ފެތުރޭ އެއްޗެއް ކަމަށް ވިދާޅުވެ، ފޭކް ނިއުސްއާއި މަޞްނޫޢީ މީޑިއާގެ ސަބަބުން ޑިމޮކްރަސީއަށް ބޮޑު ނުރައްކަލެއް ކުރިމަތިވާކަމަށް ރައްޔިތުންގެ މަޖިލީހުގެ ނައިބް ރައީސް އަހުމަދު ނާޡިމް ވިދާޅުވެއްޖެ އެވެ.
ނާޡިމްް މިފަދައިން ވިދާޅުވީ މިހާރު އޮސްޓްރޭލިއާގެ ސިޑްނީގައި ކުރިއަށްދާ ކޮމަންވެލްތު ޕާލަމެންޓަރީ އެސޯސިއޭޝަންގެ 67 ވަނަ ކޮންފަރެންސްގައި ތަޤުރީޤްކުރައްވަމުން ނެވެ. ނާޡިމްގެ ތަޤްރީރުގައި، މީސްމީޑިއާގައި ފެތުރޭ ދޮގު މަޢުލޫމާތަކީ ތެދު މަޢުލޫމާތަށް ވުރެން ހަ ގުނަ ބާރަށް ފެތުރޭ އެއްޗެއް ކަމަށް ވިދާޅުވެ، ފޭކް ނިއުސްއާއި މަޞްނޫޢީ މީޑިއާގެ ސަބަބުން ޑިމޮކްރަސީއަށް ކުރިމަތިވާ ނުރައްކާތަކަށް އަލިއަޅުއްވާލެއްވި އެވެ.
”ފޭކް ނިއުސް އާއި މަޞްނޫޢީ މީޑިއާއިން ހަމައެކަނި މުޖުތަމަޢާއި ފަރުދުންނަށް އޮޅުވާލަނީކީއެއް ނޫން. އެއީ، މުޅި ޑިމޮކްރެޓިކް ނިޒާމު ގަޑުބަޑުކޮށްލައި ހަލަބޮލިކޮށްލާ ވަސީލަތެއް،“ ނާޡިމް ވިދާޅުވި އެވެ.
މި މައްސަލައަށް ހައްލެއް ހޯދުމަށްޓަކައި، ނާޡިމް ވަނީ ކޮމަންވެލްތުގެ ޤައުމުތަކުން ތަޢުލީމީ ނިޒާމުގައި ބޭނުންކުރުމަށް މީޑިއާ ލިޓެރެސީ ކަރިކިއުލަމެއް އެކުލަވާލުމަށް ގޮވާލައްވާފަ އެވެ. އަދި މި ކަރިކިއުލަމް ވާންވާނީ ހުރިހާ ޢުމުރުފުރައަކަށް އެކަށޭނަ އަދި މެންބަރު ޤައުމުތަކުގެ އަމިއްލަ ސަޤާފަތަށް ބައްޓަންކުރެވޭ މަންހަޖަކަށް ކަމަށްވެސް އެމަނިކުފާނު ވިދާޅުވި އެވެ.
އޭގެއިތުރުން، ނާޡިމް ވަނީ ”ކޮންމެ ގޭބިސީއެއްގައި މަޢުލޫމާތު ފާރަވެރިއެއް“ ބެހެއްޓުމުގެ މޮޑެލްއެއް ހުށަހަޅުއްވާފަ އެވެ. މި މޮޑެލްގެ ދަށުން، މީޑިއާއަށް ހޭލުންތެރިވެފައިވާ ދަރިވަރުން އެމީހުންގެ ހުނަރުތައް ބެލެނިވެރިންނާއި މުޖުތަމަޢާ ހިއްސާކުރާނެ އެވެ.
ކޮންފަރެންސްގައި 56 ޤައުމެއްގެ މަންދޫބުން ބައިވެރިވެ، ޑިޖިޓަލް ދުނިޔޭގައި ޑިމޮކްރަސީ ރައްކާތެރިކުރުމުގެ ސްޓްރެޓެޖީތަކާ ބެހޭގޮތުން މަޝްވަރާކޮށްފައިވެ އެވެ. ނާޡިމްގެ ތަޤްރީރު ނިންމަވާލައްވަމުން، ރާއްޖެއާއި އޮސްޓްރޭލިއާގެ ދެމެދުގައި އޮތް ގުޅުމަކީ ”ކޮމަންވެލްތުގެ މެންބަރުންގެ މެދުގައި އެއްބާރުލުމުގެ މޮޑެލެއް“ ކަމަށް ސިފަކުރެއްވި އެވެ.
ރައްޔިތުންގެ މަޖިލިސް ރައްޔިތުންގެ މަޖިލީހުގެ ނައިބް ރައީސް އަހުމަދު ނާޒިމް ކޮމަންވެލްތު
