ހެލްތް މިނިސްޓްރީން މާދަމާ ފެށުމަށް ހަމަޖެހިފައިވާ ’ހެލްތް އެކްސްޕޯ 2024‘ ގެ މީޑިއާ ޕާޓްނަރަކަށް ޖަވިޔަނި އެމްވީ ހަމަޖައްސައިފި އެވެ.
ހެލްތް އެކްސްޕޯގެ ހަބަރުތައް ޖަވިޔަނި ނޫހުން ގެނެސް ދޭނެ އެވެ. އަދި މި އެކްސްޕޯގެ ވީޑިއޯތަކާއި ފޮޓޯތައް ޖަވިޔަނި ނޫހުގެ ސޯޝަލް މީޑިއާއިން ފެނިގެން ދާނެ އެވެ.
ދެ ދުވަހުގެ މުއްދަތަކަށް ކުރިއަށްދާ މި އެކްސްޕޯގައި މާލެ ސަރަހައްދުގެ ހޮސްޕިޓަލްތަކާއި ކްލިނިކްތަކާއި ޖަމިއްޔާތަކުން ބައިވެރިވާނެ އެވެ. މި އެކްސްޕޯގައި ޖުމުލަ 50 ސްޓޯލް ހުންނާނެކަމަށް ހެލްތް މިނިސްޓްރީން ބުނެ އެވެ.
ހުޅުމާލެ ސެންޓްރަލް ޕާކުގައި ކުރިއަށް ގެންދިއުމަށް ނިންމާފައިވާ މި އެކްސްޕޯ ފަށާނީ މާދަމާ ރޭ 20:00 ގަ އެވެ. މާދަމާ ރޭ 23:00 އާ ހަމައަށް މާދަމާގެ ދަންފަޅި ކުރިއަށް ދާނެ އެވެ. އެއަށްފަހު ހުކުރު ދުވަހުގެ ހަވީރު 16:00 އިން 18:00 އަށް އެކްސްޕޯ ކުރިއަށް ގެންދަން ނިންމާފައިވާއިރު ހުކުރު ދުވަހުގެ ރޭ މި އެކްސްޕޯ ކުރިއަށް ދާނީ 20:00 އިން 23:00 އަށެވެ.
ހެލްތް މިނިސްޓްރީން ބުނީ މި އެކްސްޕޯއަށް ޒިޔާރާތް ކުރާ ފަރާތްތަކުގެ މެދުގައި ނަގާ ގުރުއަތަކުން ހޮވޭ ދެ ފަރާތަކަށް އުމުރާ ދަތުރެއް ދިނުމަށް ނިންމާފައިވާ ކަމަށެވެ.
މީގެ އިތުރުން މި އެކްސްޕޯގެ ތެރެއިން ސިއްހީ ދާއިރާއިން ތައުލީމް ހާސިލްކުރަން ބޭނުންވާ މީހުންނަށް ހުރި ފުރުސަތުތަކާއި ޑޮކްޓަރަށް ދެއްކުމާއި ހެލްތު ސްކްރީނިން ހެދުމުގެ ހިދުމަތް ދިނުމަށްވެސް ވަނީ ނިންމާފަ އެވެ. އަދި އެކިއެކި ބަލިތަކާ ގުޅޭ މައުލޫމާތުތައް ދިނުމަށްވެސް ވަނީ ހަމަޖެހިފަ އެވެ.
ހެލްތް މިނިސްޓްރީން ބުނީ މި އެކްސްޕޯ ކުރިއަށް އޮތް އަހަރުތަކުގައި ބޭއްވުމަށް ނިންމާފައިވާ ކަމަށެވެ.
