ކައުންސިލުތަކުގެ ބްލޮކް ގްރާންޓަށް އަންނަ އަހަރުގެ ބަޖެޓްގައި 699 މިލިއަން އިތުރުކުރުމަށް ފިނޭންސް މިނިސްޓަރ މޫސާ ޒަމީރު އެދިވަޑައިގެންފި އެވެ.
މިނިސްޓަރ ޒަމީރު މިގޮތަށް އެދިވަޑައިގަތީ މިއަދު ބޭއްވި މަޖިލީހުގެ ޖަލްސާގައި އިއްވެވި ސިޓީފުޅެއްގަ އެވެ.
މި ސިޓީގައި ޒަމީރު ވަނީ 2025 ވަނަ އަހަރަށް ލަފާކުރި ބަޖެޓްގައި ކައުންސިލުތަކަށް ބޮލްކް ގްރާންޓްގެ ގޮތުގައި 1.4 ބިލިއަން ރުފިިޔާ ކަނޑައަޅާފައިވާ ކަން ފާހަގަކުރައްވާފަ އެވެ. އެއީ 56.6 ބިލިއަން ރުފިޔާގެ ޖުމްލަ ބަޖެޓްގެ 2 އިިންސައްތަ އެވެ.
އެހެން ނަމަވެސް، ލާމަރުކަޒީ ގާނޫނުގައި ބަޔާންކުރާ ގޮތުން ކޮންމެ އަހަރެއްގެ ބަޖެޓްގެ 5 އިންސައްތަ ބްލޮކް ގްރާންޓްގެ ގޮތުގައި ދޭން ޖެހޭނެ އެވެ.
އެހެންކަމުން، މިނިސްޓަރ ފޮނުއްވި ސިޓީގައި ވަނީ ހުށަހަޅާފައިވާ ބަޖެޓުގައި ބްލޮކް ގްރާންޓްގެ އަދަދު ހިސާބު ކުރުމުގައި ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައި މިހާރު ކަނޑައަޅާފައިވާ މިންގަނޑުގައި ހިފަހައްޓަން ސަރުކާރުން ނިންމާފައިވާ ކަމަށް ވިދާޅުވެފަ އެވެ. މި ބަދަލު ގެންނަން ބޭނުންވާނެ ކަމަށް ލަފާކުރާ 699.6 މިލިއަން ރުފިޔާ، ބަޖެޓުގެ ޖުމުލަ އަދަދު އިތުރު ނުވާ ގޮތަށް ކޮންޓިންޖެންސީ ބަޖެޓުން ބަދަލުކުރާ ގޮތަށް ހަމަޖައްސައިދިނުމަށް އެދިވަޑައިގެންފައި ވެއެވެ.
މި ފަހަރުގެ ބަޖެޓް ފާސްވާއިރުގައިވެސް ގާނޫނުގައި އޮތް ގޮތަށް ބްލޮކް ގްރާންޓުގެ ގޮތުގައި ފަސް އިންސައްތަ ކައުންސިލްތަކަށް ލިބޭނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުވެސް ދާދި ފަހުން ބޭއްވި ”އޮޅު ހިޔާ“ ހުޅުވާދިނުމުގެ ރަސްމިއްޔާތުގައި ވިދާޅުވެފައި ވެއެވެ.
ރައީސުލްޖުމްހޫރިއްޔާ ވަނީ ބްލޮކް ގްރާންޓުގެ 5 އިންސައްތައިގެ އިތުރަށް ލޯކަލް ޓޫރިޒަމްގެ ތެރެއިން ލިބޭ ޓެކްސްގެ ވަކި އިންސައްތައެއް ކައުންސިލުތަކަށް ލިބޭގޮތް ހެދުމަށް ޤާނޫނަށް އިސްލާހުގެނައުމަށް ފޮނުއްވާނެކަމުގައި ވިދާޅުވެފަ އެވެ. މީގެ އިތުރަށްވެސް ގާނޫނުގައި ލިޔެވިފައިހުރި، މިއަދާ ހަމައަށް ނުކޮށްހުރި ކަންތައްތަކެއް ކުރިއަށް އޮތް ހަފުތާއެއް ނުވަތަ ދެހަފުތާއެއްގެ ތެރޭގައި ކައުންސިލްތަކަށް ހަވާލުކުރުމަށްޓަކައި ވަޒީރުންގެ މަޖިލީހުގައި މަޝްވަރާތައް ހިނގަމުންދާކަމުގައި އެމަނިކުފާނު ވިދާޅުވި އެވެ.
ރައްޔިތުންގެ މަޖިލިސް މިނިސްޓްރީ އޮފް ފިނޭންސް ފިނޭންސް މިނިސްޓަރު މޫސާ ޒަމީރު
