މާލެ އާއި ހުޅުމާލެ ސަރަހައްދުގެ ޓެކްސީގެ ހިދުމަތް ދައުލަތުގެ ވިޔަފާރިއަކާ ހަވާލުކުރުމަށް ސަރުކާރުން ނިންމުމުން ޓެކްސީ ޑްރައިވަރުންނަށް ބުރަ ނުވާނެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ޔަގީންކަން ދެއްވައިފި އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު އަމީން ވިދާޅުވީ ޓެކްސީގެ މައްސަލައަކީ ފަހުގެ މައްސަލައެއް ނޫން ކަމަށާއި، އެއީ އާންމުންގެ ވަރަށް ބޮޑު ކަންބޮޑުވުމެއް ކަމަށެވެ.
މި ކަންބޮޑުވުންތަކުގެ ތެރޭގައި ވަކި ގަޑިތަކެއްގައި ޓެކްސީ ނުލިބުމާއި، ވަކި ތަންތަނަށް ފަސިންޖަރުން ގެންދިއުމަށް ޓެކްސީތަކުން ދެކޮޅު ހެދުން އަމީންގެ ވާހަކައިގައި ފާހަގަ ކުރެއްވި އެވެ.
”މިއީ އާންމުންގެ ގިނަ ބަޔަކު ކަންބޮޑުވާ މައްސަލަތަކެއް. މީހުން ބޭނުންވާ ވަގުތެއްގައި ޓެކްސީ ނުލިބޭކަން. މިކަންކަން ދެނެގަނެވޭނީ ނާޒުކު ތަހުލީލުތަކެއްގެ ތެރެއިން. މާލޭގެ އެއް ހިސާބުން އަނެއް ހިސާބަށް ދާން ޓެކްސީ ނުލިބޭކަން، އެކަމަކު ޓެކްސީ ލިބޭނެ ސިނަމާލެ ބްރިޖް ހުރަސްކުރަންޏާ“ އަމީން ވިދާޅުވި އެވެ.
މިހެން ވިޔަސް ޓެކްސީ ވިޔަފާރިތައް އެއްވެސް ހުރަހެއް ނެތި ހިންގޭނެ ކަމަށް އަމީން ވިދާޅުވި އެވެ.
ޓެކްސީ ޑްރައިވަރުންގެ ޖަމިއްޔާގެ މެންބަރުންނާ ބައްދަލު ކުރައްވާފައިވާ ކަމަށާއި، ޑްރައިވަރުންނަށް ގެއްލުމެއް ލިބޭ ފަދަ އެއްވެސް ފިޔަވަޅެއް ސަރުކާރުން ނުނަގާނެ ކަމުގެ ޔަގީންކަން ދެއްވި ކަމަށް ތަފްސީލުކޮށް ވިދާޅުވި އެވެ.
މިނިސްޓަރު އިތުރަށް ވިދާޅުވީ ޓެކްސީ ޑްރައިވަރުން އެމީހުންގެ މަސައްކަތް ކުރަނީ އާމްދަނީއެއް ހޯދުމަށް ކަމަށާއި ޓެކްސީގެ ނިޒާމް ފަރުމާ ކުރާނީ އާމްދަނީއަށް އަސަރު ނުކުރާ ގޮތަށް ކަމަށެވެ.
މިނިސްޓަރ ދެންނެވީ ޓެކްސީގެ އަގުތައް މިހާރު ގާއިމްކޮށްފައި އޮތް އިރު އެއަށް އިތުރު ބަދަލެއް ނުގެނެވޭނެ ކަމަށެވެ. އަދި އާންމުންގެ އަތުގައި މާލީ ވަސީލަތްތައް ނެތުމުން ބޮޑު އަގެއްގައި ޓެކްސީގެ ހިދުމަތުގެ މިންގަނޑު މަތިކުރަން ޖެހޭ ކަމަށް ވެސް އޭނާ ވިދާޅުވި އެވެ. މާލޭ ސަރަހައްދުގެ އާބާދީއަށް ހިދުމަތް ދިނުމުގެ ގާބިލުކަން ވެސް ނެތް ކަމަށާއި ސާވިސް ފްލީޓުގައި ބޭނުންވާ ވަސީލަތްތައް ގާއިމް ކުރަން ޖެހޭ ކަމަށް ވެސް އޭނާ ވިދާޅުވި އެވެ.
”މިވަގުތު ޓެކްސީގެ ހިދުމަތް ދެމުން އަންނަ ފަރާތްތަކަށް އެއްވެސް އަސަރެއް ނުކުރާނެ،“ މައްސަލަ ސިޔާސީ ކުރުމާމެދު ހިތްހަމަނުޖެހުން ފާޅުކުރައްވައި އަމީން ޔަގީންކަން ދެއްވި އެވެ.
ރަސްމީކޮށް އިއުލާން ނުކުރި ނަމަވެސް، ސަރުކާރުން އެކުލަވާލި މާލެ ފަހި ޕްރޮގްރާމްގައި ސަރުކާރުން ”ޓެކްސީ ލައިނެއް“ ގާއިމްކުރުން ހިމެނުމުން ޓެކްސީ ޑްރައިވަރުންގެ ޖަމިއްޔާގެ މެންބަރުން ވަނީ އެ މައްސަލަ ރައްޔިތުންގެ މަޖިލީހާއި ހަަމައަށް ގެންގޮސްފަ އެވެ.
އެކަމާ ގުޅޭ ގޮތުން ރައްޔިތުންގެ މަޖިލީހުގެ ކޮމިޓީއަށް ޖަވާބު ދެއްވަމުން އަމީން ވިދާޅުވީ ސަރުކާރުން އެ ދާއިރާއަށް ވަދެ، ކަމާބެހޭ ގާނޫނުތަކާއި ގަވާއިދުތަކާ އެކު ކޮންޓްރޯލް ނަގަން ޖެހޭ ކަމަށެވެ.
މިނިސްޓަރު މުހައްމަދު އަމީން މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން
