މާލޭގެ މަޖީދީމަގުގައި ހުންނަ ޒިއޯންމޮބައިލްސް 4 ފިހާރަ ފަޅާލައިގެން ވައްކަން ކުރި މީހާގެ މައްޗަށް 20 ދުވަހުގެ ބަންދެއް ކްރިމިނަލް ކޯޓުން ޖަހައިފި އެވެ.
ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނެފައިވަނީ، މި މައްސަލައާ ގުޅިގެން ހައްޔަރުކުރި 47 އަހަރުގެ ދިވެހި ފިރިހެނާގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން، އޭނާ 20 ދުވަހަށް ފުލުުހުުންގެ ބަންދުގައި ބެހެއްޓުމަށް ކޯޓުން މުއްދަތު ޖަހައިދީފައިވާ ކަމަށެވެ.
މި މައްސަލަ ފުލުހުންނަށް ރިޕޯޓްކޮށްފައިވަނީ އިއްޔެ 5:35 ހާއިރުގަ އެވެ. ސޯޝަލް މީޑިއާގައި ދައުރުވަމުންދާ ވީޑިއޯއެއްގައި ދައްކާ ގޮތުން، އެކަކު ފިހާރައިގެ ބިއްލޫރިގަނޑު ތަޅާލުމަށްފަހު، އަނެކަކު އެތަނަށް ވަދެ، ވަތްގަނޑު ހާވައި ޑިސްޕްލޭގައި އަތުރާފައި ހުރި ފޯނުތަކާއި އެހެނިހެން ތަކެތި ވަގަށް ނަގާފައިވެ އެވެ.
ފުލުހުން ބުނެފައިވަނީ މި މައްސަލަ އިތުރަށް ތަޙުޤީޤުކުރަމުން ގެންދާ ކަމަށެވެ. އެހެންނަމަވެސް، މިހާތަނަށް މި މައްސަލައާ ގުޅޭ އިތުރު މަޢުލޫމާތެއް ހާމަކޮށްފައެއް ނުވެއެވެ.
