ޓެކްސީ ޑްރައިވަރުންދޭ ޚިދުމަތަށް ގެއްލުންވާނެ އެއްވެސް ގޮތަކަށް ސަރުކާރުން ޢަމަލެއް ނުކުރާނެ ކަމަށް ޓްރާންސްޕޯޓް މިނިސްޓަރ މުޙައްމަދު އަމީން މިއަދު ވިދާޅުވެއްޖެ އެވެ.
މިނިސްޓަރ އަމީން މިފަދައިން ވިދާޅުވީ މިއަދު ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ނެވެ.
”މިނިސްޓަރ ދެއްވި ޔަގީންކަމެއް އަނބުރައެއް ނުލައްވަން، މިއަދުވެސް މި ދަންނަވަނީ އެ ވިޔަފާރީގައި ތިބި ބޭފުޅުންނަށް އަޅުގަނޑުމެން ސަރުކާރަކުންނެއް އެއްވެސް ގެއްލުމެއްވާ ގޮތަކަށް އެއްވެސް ކަމެއް ނުކުރާނަމޭ.“ މިނިސްޓަރ ވިދާޅުވި އެވެ.
މިނިސްޓަރ އަމީން އިތުރަށް ވިދާޅުވީ، ޓެކްސީ ޑްރައިވަރުންގެ އާމްދަނީއަށް ގެއްލުންނުވާ ގޮތަށް ނިޒާމް ބައްޓަން ކުރެވިދާނެ ކަމަށެވެ. ނަމަވެސް، އާންމު ރައްޔިތުންނަށް ޓެކްސީގެ ޚިދުމަތް ހޯދަން އާމްދަނީ ލިބޭ ނިސްބަތަށް ބަލާއިރު މިހާރު ހުރި އަގުތަކަށްވުރެ ބޮޑުކުރުމަކީ ކުރެވޭނެ ކަމެއް ނޫން ކަމަށް މިނިސްޓަރު ފާހަގަކުރެއްވި އެވެ.
މިހާރު ކަނޑައެޅިފައި ހުރި އަގުތައް ބަދަލުނުކޮށް، ކޮންމެވެސް ނިޒާމެއްގެ ތެރެއިން ޓެކްސީ ސަރވިސްގެ ފެންވަރު މަތިކުރަންޖެހޭ ކަމަށާއި، އާ ޓެކްސީތައް ހޯދަން ޖެހޭ ކަމަށްވެސް މިނިސްޓަރ އަމީން ވިދާޅުވި އެވެ. އަދި އާ މިންގަނޑުތަކަކާއި އާ އިކުއިޕްމަންޓްތަކެއް މި ނިޒާމުގެ ތެރެއަށް ތަޢާރަފުކުރެވިގެން ނޫނީ މިހާރު އޮތް ޚިދުމަތްދޭ ފްލީޓަށް ބަދަލެއް ނާންނާނެ ކަމަށް މިނިސްޓަރު ފާހަގަކުރެއްވި އެވެ.
މިނިސްޓަރު މުހައްމަދު އަމީން މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން
