ޑޮމެއިން ނަންބަރު ބޯޑުތައް އަލުން ވިއްކަން ފަށާއިރު އެ ބޯޑުތަކުގައި އާއިލީ މީހެއް ނުވަތަ އަނބިމީހާ ނުވަތަ ”ގާލްފްރެންޑް“ގެ ނަންވެސް ޖެހިދާނެކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެ އެވެ.
މިނިސްޓަރު އަމީން މިހެން ވިދާޅުވީ ޓްރާންސްޕޯޓް މިނިސްޓްރީގެ އެންމެ ފަހުގެ މައުލޫމާތުތައް ހިއްސާ ކުރުމަށް ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ނެވެ.
މިނިސްޓަރު ވިދާޅުވީ މިހާރު ޑޮމެއިން ދޫކުރާ އުސޫލުން ހަމައެކަނި ނަންބަރު ބޭނުންކޮށްގެން ޑޮމެއިން ދޫކުރާކަނަށް ގާނޫނުން ލާޒިމެއް ނުކުރާ ކަމަށެވެ. އަދި އިނގިރޭސި އަކުރުތައްވެސް އެ ބޯޑުތަކުގައި ބޭނުން ކުރުމުގެ ފުރުސަތު އޮންނަކަމަށް މިނިސްޓަރު ވިދާޅުވި އެވެ.
ޓްރާންސްޕޯޓް މިނިސްޓްރީން ދެން ޑޮމެއިން ވިއްކާނީ ބިޑަށް ދޫކޮށްގެން ކަމަށާއި ބިޑިން ޕްރޮސެސް ކުރިއަށް ގެންދާނީ އިލެކްޓްރޯނިކް ބިޑިންގެ ތެރެއިންކަމަށް މިނިސްޓަރު ވިދާޅުވި އެވެ.
ތީގެން ބޭފުޅަކު ފަހަރެއްގަ ބޭނުންފުޅުވެވަޑައިގެންފާނެ ތިބޭފުޅުންގެ އާއިލީ ބޭފުޅެއްގެ ނަން ނޫނީ އަނބިކަނބަލުން ނޫނީ ގާލްފްރެންޑްގެ ނަމެއްވެސް ހަމަ ކޮންމެސް ދިމާލަކަށް އެމްފަސައިޒް ވާ ގޮތަކަށް ލާން ދެއްތޯ. އެ ޖާގަ، އެ ފުރުސަތު އެބަ ލިބޭ ގާނޫނީ ގޮތުންވެސް.
ދުބާއީ، ސްޕެއިން އަދި ސިންގަޕޫރު ފަދަ ގައުމުތަކުގައިވެސް މި ހިދުމަތް ދެމުން ދަނީ މިގޮތަށްކަން ފާހަގަ ކުރައްވަމުން އަމީން ވިދާޅުވީ ޒަމާނަށް ފެތޭ ގޮތަށް ޒުވާނުންނާއި ޑޮމެއިން ގަންނަން ބޭނުންވާ މީހުންނަން މި ހިދުމަތް ދިނުމަށް އެއްވެސް ހުރަހެއް ނެތް ކަމަށެވެ. އެހެންކަމުން މި ހިދުމަތް އަލުން ހުޅުވާލާނީ ޒަމާނީކޮށް ދުނިޔޭގެ އެހެން ގައުމުތަކުގައިވެސް މި ހިދުމަތް ދެމުންދާ ގޮތަށް ކަމަށް މިނިސްޓަރު ވިދާޅުވި އެވެ.
ރައީސް އޮފީސް މިނިސްޓަރު މުހައްމަދު އަމީން މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން
