މޯލްޑިވްސް އިސްލާމިކް ބޭންކް (އެމްއައިބީ)އަށް 3 ވަނަ ކުއާޓަރުގައި 82 މިލިއަން ރުފިޔާގެ ފައިދާއެއް ލިބިއްޖެ އެވެ.
މިއީ 2023 ވަނަ އަހަރާ އަޅާބަލާއިރު 54 އިންސައްތައިގެ ކުރިއެރުމެކެވެ.
އެމްއައިބީން ޝާއިއުކޮށްފައިވާ ތިން ވަނަ ކުއާޓަރުގެ ރިޕޯޓުން ދައްކާ ގޮތުގައި މި ކުއާޓަރުގައި ބޭންކުގެ އެސެޓް ވެލިއު ވަނީ 10 ބިލިއަން ރުފިޔާ އަށް އަރާފަ އެވެ. މިއީ އެމްއައިބީ އިން މި އަދަދަށް ވާސިލްވި ފުރަތަމަ ފަހަރެވެ. މިއީ މިދިޔަ އަހަރުގެ ތިންވަނަ ކުއާޓަރާއި އަޅާބަލާއިރު 34 އިންސައްތައިގެ ކުރިއެރުމެއްވެސް މެއެވެ.
އެ ރިޕޯޓުގައިވާ ގޮތުން ބޭންކުގެ ފައިނޭންސިން ޕޯޓްފޯލިއޯ ވަނީ 5 ބިލިއަން ރުފިޔާ އަށް އިތުރުވެފަ އެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 45 އިންސައްތައިގެ ކުރިއެެރުމެކެވެ.
ރިޕޯޓުގައިވާ ގޮތުން ދެވަނަ ކުއާޓަރުގައި ބޭންކުގެ ޑިޕޮސިޓް ބޭސް 8 ބިލިއަން ރުފިޔާއަށް އަރާފައިވާއިރު، މިއީ ވޭތުވެދިޔަ އަހަރަށްވުރެ 26 އިންސައްތަ އިތުރު އަދަދެކެވެ. އަދި މިދިޔަ އަހަރުގެ ތިންވަނަ ކުއާޓަރާއި އަޅާބަލާއިރު ބޭންކުގެ އާމްދަނީވެސް ވަނީ 51 އިންސައްތަ އިތުރުވެފަ އެވެ.
އެމްއައިބީން ފާހަގަކުރާ ގޮތުގައި މިއަހަރުގެ ތިން ކުއާޓަރުގައި ވެސް އެ ބޭންކަށް ފައިދާ ލިބިފައިވެ އެވެ.
