ރާއްޖޭގައި އިސްލާމިކް ސްޓޭޓް (އައިއެސް) ގެ ހަރަކާތްތައް ރާވާ ހިންގުމުގައި އެންމެ އިސްކޮށް ހަރަކާތްތެރިވާކަމަށް ތުހުމަތުކުރެވުނު މައްސަލައިގައި 27 އަހަރުގެ ޖަލު ހުކުމެއް އިއްވި ފުވައްމުލަކު، މާދަޑު، ކަރިއްޔާވިލާ މުހައްމަދު އަމީންގެ އިސްތިއުނާފު އަޑުއެހުމެއްތައް ސިއްރު ނުކުރުމަށް ހައިކޯޓުން ނިންމައިފި އެވެ.
އަމީންގެ މައްޗަށް ދައުލަތުން އުފުލާފައިވަނީ ޓެރަރިސްޓް ޖަމާޢަތެއްގައި ބައިވެރިވުމުގެ ކުށުގެ ދަޢުވާއާއި، ޓެރަރިޒަމްގެ އަމަލެއް ކުރުމަށް ރޭވުމުގެ ކުށުގެ ދައުވާއެވެ. ކްރިމިނަލް ކޯޓުގައި ސިއްރުން ކުރިއަށް ގެންދިޔަ އަޑުއެހުންތަކަށްފަހު އަމީންގެ މައްޗަށް 27 އަހަރުގެ ޖަލު ހުކުމެއް އިއްވީ 8 ނޮވެންބަރު 2023 ގައެވެ.
މިއަދުގެ އަޑުއެހުން ފެއްޓެވުމަށްފަހު މައްސަލަ ބައްލަވާ ފަނޑިޔާރު ވިދާޅުވީ އަމީންގެ ވަކީލުގެ ފަރާތުން ސިޓީއެއް ލިބިފައިވާ ކަމަށާއި ސިޓީގައި އެދިފައިވަނީ މައްސަލައިގެ އަޑުއެހުންތައް ސިއްރު ކުރުމަށް ކަމަށެވެ. އަމީންގެ ވަކީލް ހަމްޒާ ލަތީފް ވިދާޅުވީ، އަޑުއެހުންތައް ސިއްރުކުރަން އެދުނީ ގައުމީ ސަލާމަތް އަދި އިންޓެލިޖެންސް ބައެއް މައުލޫމާތު ހިމެނޭތީ މައްސަލައިގެ ހައްސާސްކަމުން ކަމަށެވެ. އަދި އެފަދަ ވާހަކަތަކެއް އާންމު ވެއްޖެނަމަ، ގައުމީ ސަލާމަތަށް ނުރައްކާވެދާނެ ވާހަކަތަކެއް ހިމެނިދާނެ ކަމަށްބަލާ ސިއްރު ކުރަން އެދުނީ ކަމަށެވެ. އަދި މީޑިއާގައި މި މައްސަލަ މީގެކުރިން ގެނެސްދިފައިވާ ގޮތާއި ގުޅިގެން މީގެކުރިންވެސް ސުޕްރީމް ކޯޓުން ގޮތެއް ނިންމަވާފައިވާކަން ހަމްޒާ ފާހަގަ ކުރެއްވި އެވެ.
އަޑުއެހުންތައް ސިއްރު ކުރުމަށް ހުށަހެޅި ހުށަހެޅުމަށް ދައުލަތުން ވެސް ދެކޮޅެއް ނަހަދަ އެވެ. އެހެންނަމަވެސް އެދުނީ ހުޅުވާލައިގެން އަޑުއެހުންތައް ކުރިއަށް ގެންދިއުމަށެވެ.
މި ހުށަހެޅުމާއި ގުޅިގެން ހައިކޯޓުގައި މައްސަލަ ބައްލަވާ ފަނޑިޔާރުން ނިންމެވީ އަޑުއެހުންތައް ސިއްރު ނުކުރުމަށެވެ. އަދި މައްސަލަތައް ކުރިއަށްދާއިރު ސިއްރު ކުރަންޖެހޭފަދަ ކަމެއް ދިމާވެއްޖެނަމަ އެކަމަކާމެދު ގޮތެއް ނިންމަވާނެ ކަމަށެވެ. މިމައްސަލަ ހައިކޯޓުގައި ބައްލަވާ ބެންޗުގެ ރިޔާސަތުގައި އިންނެވީ ފަނޑިޔާރު މުހައްމަދު ފައިސަލް އެވެ. ދެން ބެންޗުގައި ހިމެނެނީ އިސް ފަނޑިޔާރު ހުސައިން ޝަހީދު އަދި ފަނޑިޔާރު މުހައްމަދު ޝަނީޒެވެ.
