500 ޑޮލަރު (7،000 ރުފިޔާ) އަށް ލިބޭ ބޭހަކަށް އައިކެއާއިން 23،000 ރުފިޔާ ބިލުކޮށްފައިވާކަމަށް ރައީސް އޮފީހުގެ އިސް ތަރުޖަމާނު އަދި ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) ގެ ސީއީއޯ ހީނާ ވަލީދު ވިދާޅުވެއްޖެ އެވެ.
ހީނާ މިހެން ވިދާޅުވީ އާސަންދައަށް ގެނައި ބަދަލާއެކު ކުރިން އާސަންދަ ލިބޭ ބޭހަކަށް އާސަންދަ ނުލިބޭކަމަށް ބުނެ މީހަކު ސޯޝަލް މީޑިއާގައި ކުރި ޕޯސްޓަކަށް ޖަވާބު ދެއްވަމުންނެވެ. މި ޕޯސްޓުގައި އެ ބޭހަކީ 24،000 ރުފިޔާގެ ބޭހެއްކަމަށް އެ ޕޯސްޓު ކުރި މީހާ ބުނެފައިވެ އެވެ.
ހީނާ ވިދާޅުވީ މިކަމުގެ ހަގީގަތް ރައްޔިތުންނަށް އެނގުން މުހިންމު ކަމަށެވެ. އަދި މިއީ އާސަންދައިން ވިޔަފާރިކޮށް ނާޖާއިޒު ބޮޑެތި ފައިދާ ނަގާ އުސޫލުން ކަންކުރުމުގެ ލާމަސީލު މިސާލެއްކަމަށް ހީނާ ވިދާޅުވި އެވެ.
އާސަންދައިގެ ބޭހުގެ އަގު ރިވައިޒްކުރުމުގެ ތެރެއިން، އެންމެ ޚަރަދު ބޮޑު އެއް ބޭސްކަމުގައިވާ ’ލުސެންޓިސް އިންޖެކްޝަން‘ ގެ އަގު ޗެކްކުރުމުގެ ގޮތުން ލޮލުގެ ފަރުވާގެ ޚިދުމަތް ދޭ މި ފަރާތުން ބޭސް ގަންނަ އަގު ހޯދުމަށް އެދުމުން، ފޮނުވި އިންވޮއިސްތަކުން، މި ބޭސް އެ ފަރާތަށް ގަންނަން ލިބޭ އަގަށްވުރެ ބޮޑުތަނުން ބޮޑުކޮށް އާސަންދައަށް ބިލްކޮށްފައިވާކަން ފާހަގަކުރެވުނު.
ހީނާ ވިދާޅުވީ 500 ޑޮލަރަށް މި ބޭސް ގެނެސް 23،000 ރުފިޔާއަށް އާސަންދައަށް ބިލުކޮށްފައިވާ ކަމަށެވެ. އަދި މިއީ 18 ރުފިޔާގެ ރޭޓުން ބެލި ކަމުގައިވިޔަސް 14،000 ރުފިޔާގެ ފައިދާއެއްކަމަށް ހީނާ ވިދާޅުވި އެވެ.
މި ބޭސް އެތެރެ ކުރަން ރަޖިސްޓާ ކޮށްފައިވަނީ މުޅިން އެހެން ކުންފުންޏަކުން ކަމަށާއި ނަމަވެސް މި ކުންފުނިން އެ ބޭސް އެތެރެކޮށްފައި ނުވާކަމަށް ހީނާ ވިދާޅުވި އެވެ.
ލޮލުގެ ފަރުވާގެ ޚިދުމަތްދޭ މި ފަރާތުން ބޭސްވިއްކާފައިވަނީ ބޭސް އެތެރެކުރުމަށް ރަޖިސްޓަރީނުކޮށް ޕްރިސްކްރިޕްޝަންއަށް. އެކަމަކު ސްކީމްގެ ތެރެއިން މިއިންޖެކްޝަނަށް އެންމެ ގިނައިން ބިލްކޮށްފައިވަނީ މި ފަރާތުން.
މޯލްޑިވްސް ފުޑް އެންޑް ޑްރަގް އޮތޯރިޓީގައި ރަޖިސްޓަރީކޮށްފައިނުވާ އިންޖެކްޝަންއަކަށް ބިލުކޮށްފައިވުމާއި، އަގުގެ ބޮޑު ތަފާތަކުން ބޮޑު ފައިދާއެއް ނަގަމުންދިޔަ އިރު އެކަން އާސަންދަ ކުންފުންޏަށް ނުވަތަ ނޭޝަނަލް ސޯޝަލް ޕްރޮޓެކްޝަން އެޖެންސީއަށް އަންގައިފައިނުވާކަމަށް ހީނާ ވިދާޅުވި އެވެ. އަދި މިކަން ފާހަގަވީ އާސަންދައިގެ ބޭހުގެ އަގު ރިވައިޒްކުރުމުގެ ތެރެއިންކަމަށްވެސް އޭނާ ވިދާޅުވި އެވެ.
މި ކަން ހުއްޓުވުމަށް ފިޔަވަޅު އަޅައި އެންސްޕާގެ ވެލްފެއާ އެހީގެ ދަށުން މިހާރުވެސް ކޮންޓްރޯލްޑް އަގެއްގައި ބޭނުންވާ ފަރާތްތަކަށް މި ބޭސް ހޯދުމަށް އެހީތެރިކަން ދެވެމުންދާ ކަމަށާއި މިކަން އިތުރަށް ފުރިހަމަކުރުމުގެ މަސައްކަތްވެސް ދަނީ ހިނގަމުން ކަމަށް ހީނާ ވިދާޅުވި އެވެ.
އެކި އަމިއްލަ ފަރާތްތަކުން ވިޔަފާރީގެ ފައިދާގެ ބޭނުމަށް އާސަންދަ ބޭނުންކުރުމުގެ ނަތީޖާއެއްގެ ގޮތުން، ރައްޔިތުންނަށް ބޮޑެތި ގެއްލުން ލިބޭކަމީ ހަގީގަތެއް.
މިހެން ދިމާވަނީ ޒަމާނުއްސުރެ މިނިޒާމްގެ ތެރޭގައި ހުރި މިފަދަ އެތައް މައްސަލައަކަށް އެޓެންޑް ނުކުރެވި، އެއް ނިޒާމް އަނެއް ނިޒާމާ ވާހަކަ ނުދެކެވި ބޮއްސުންލާން ދޫކޮށްލެވިފައި އޮތުމުގެ ސަބަބުން ކަމަށާއި ރައީސްގެ ލަފާފުޅުގެ ދަށުން، ﷲ ގެ އިރާދަފުޅާއެކު އެކަން ބަދަލުކޮށް އިސްލާޙު ކުރާނެކަމަށް ހީނާ ވިދާޅުވި އެވެ.
ހީނާ ވަލީދު ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) ރައީސުލްޖުމްހޫރިއްޔާ ޑރ. މުހައްމަދު މުއިއްޒު އާސަންދަ
