ދިވެހިރާއްޖޭގެ އިސްލާމީ ޔުނިވާސިޓީ އިން ހިންގާ ”އިޤްރައު ފޮތް މައުރަޒު 2024“ ހުޅުވަން ތައްޔާރުވެއްޖެ އެވެ.
އައިޔޫއެމް އިން ބުނީ މި ފޮތް މައުރަޒު ފަށާނީ މި ހިނގާ މަހުގެ 13 އިން 16 އަށް ކަމަށެވެ. މި އަހަރުވެސް މި މައުރަޒުގައި ފޮތް ވިއްކާ އަދި ޝާއިއު ކުރާ ފަރާތްތަކުގެ އިތުރުން ލިތުންތެރިންވެސް ބައިވެރިވުމަށް ވަނީ ހަމަޖެހިފަ އެވެ.
އައިޔޫއެމް އިން ބުނީ ”އިގްރައު“ ފޮތް މައުރަޒުން ހުރިހާ އުމުރުފުރާތަކާާ ގުޅޭ އެކި މާއްދާތަކުގެ ފޮތްތައް ހެޔޮ އަގުގައި ލިބޭނެ ކަމަށެވެ. މުޖުތަމައުގައި ފޮތްތެރިކަމަށް ޝައުގުވެރިކަން އުފެއްދުމަކީ މައުރަޒުގެ އެއް މަގްސަދެވެ.
މި މައުރަޒުގައި އޮންލައިންކޮށް ފޮތް ވިއްކުމާއި ހަދިޔާކުރުމާއި ގަތުމުގެ ފުރުސަތުގެ އިތުރުން އިސްލާމީ ޝަރީއަތުގެ އިތުރުން ދިވެހި ބަހާއި ގުޅޭ މައުޟޫއުތަކަށް ޕެނަލް ޑިސްކަޝަނެއްވެސް ހިންގުމަށް އައިޔޫއެމް އިން ރާވާފައި ވެއެވެ. މި މައުޟޫއުތަކަށް އިންސާފުކުރާނީ އެ ދާއިރާތަކުން ފާހަގަކޮށްލެވޭ އިލްމީ ބޭފުޅުން ނެވެ. މި މައުޟޫއުތަކަށް ސުވާލުކުރުމުގެ ފުރުސަތު އާންމުންނަށް ހުޅުވާލާފައި ވެއެވެ.
މީގެ އިތުރަށްވެސް، ކުޑަކުދިންނަށް އަމާޒުކޮށްގެން މަދަހަ، ބަނދި، ރައިވަރު އަދި ވާހަކަ ކިޔުމާއި ތަފާތު ހުނަރުތައް ދަސްވެދާނެ ފަދަ ހަރަކާތްތައް ހިމެނޭގޮތަށް ”ނޮލެޖް ކޯނާ“ ހިންގުމަށް ހަމަޖައްސާފައި ވެއެވެ. މި ހަރަކާތްތައް ކުރިއަށްދާނީ 15 އަދި 16 ވާ ހުކުރު އަދި ހޮނިހިރު ދުވަހުގެ ހަވީރު 16:00 އިން 18:00 އަށެވެ. އެއާއެކު، އުމުރުން 6 އަހަރާއި 11 އަހަރާ ދެމެދުގެ ކުދިންނަށް އަމާޒުކޮށްގެން ހިންގާ ”ބުކްމާކް“ ފަރުމާކުރުމުގެ މުބާރާތެއް ޔުނިވާސިޓީގެ ކުތުބުހާނާގައި ކުރިއަށްދާނެ އެވެ. މި މުބާރާތް އޮންނާނީ ނޮވެމްބަރު 15 ގެ 16:00 އިން 18:00 އަށެވެ.
2018 ވަނަ އަހަރުން ފެށިގެން އަހަރަކު އެއް ފަހަރު ބާއްވާ މި މައުރަޒު މިފަހަރު ލ. ފޮނަދޫ އަދި ފުވައްމުލަކުގައިވެސް ބާއްވާނެ އެވެ. މި ދެރަށުގައި މައުރަޒު ބާއްވާނީ ނޮވެމްބަރު 15 އިން 16 އަށެވެ.
އިތުރު މައުލޫމާތު ހޯދުމަށް ޔުނިވާސިޓީގެ ކޯލް ސެންޓަރު 1405 އަށް ގުޅުމަށް އައިޔޫއެމް އިން އެދިފައި ވެއެވެ.
